ENGKILILI: Sebana peranak Rumah June Bai, Titok Ili ditu ti begunaka taba baru endur paking kerita nerima perati ari Kaban Parlimen Lubok Antu, Jugah Muyang.

TR June Bai madah peminta nya udah suah dikenatai ngagai pengari rayat kenyau ari niang tuai rumah sebedau tu lalu peminta nya diatu nyau deka nyadi nyata.

“Terima kasih ngagai YB (Jugah Muyang) laban udah madahka berita manah deka ngungkupka belanja RM200, 000 dikena mantu ngemujurka juluk tu. Kebendar taba semina betakah 10 kaki ari mua empelua rumah panjai kami.

“Diatu ba mua rumah kami nya bisi siti bukit lalu nya dipinta kami sungkur awakka bisi alai raban nembiak aku paking kerita kelimpah ulih dikena kami nirika balai raya sereta gerija jemah,” ku iya madah ngagai Suara Sarawak, kemari.

Ungkup penemu, rumah panjai Titok Ili urung sejam penyauh ari Pasar Lubok Antu diatu udah bisi disambung karan enggau ai paip bukit.

Berebak enggau nya, June arapka perintah sekalika perintah nengeri tauka perintah besai mantu lengkas agi melakin jalai ngelawa rumah panjai nya ke mansa menua San Semanju diatu semina setengan aja udah dibelakin perintah ari pun jalai besai.

TABA PAKING….Bukit sepiak kiba rumah panjai Titok Ili deka disungkur nengah bantu peminta ari Kaban Parlimen Lubok Antu, Jugah Muyang.