SARIKEI: Perintah ngembuan perambu ngemansangka kandang menua Kerubong ngambi ngubah tikas idup rayat dia ungkup timpuh panjai.

Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka, perambu nya nyengkaum Projek Jalai Tujuh Kilometer (KM) ari Selalang /Kerubong nuju ke Sare enggau ngagai Sarikei.

Ku iya, jalai penyambung nya altenatif kedua ungkup peranak Kabong, Sessang, Nyabor, Gerigat ngagai Sarikei enggau ke Sibu kelimpah ari Jalai Besai Pan Borneo.

“Jalai baru nya deka ngemandak timpuh pejalai peranak ba 13 buah rumah panjai.

“Pia mega, jalai tu ulih nyambung bekal ai enggau bekal kuasa karan ungkup peranak dia dudi hari.

“Aku minta kerejasama enggau sukung ari peranak ditu ngambika perambu nya ulih dikemujur,” terang Len Talif.
Len Talif mansutka jaku nya ba Program Belia Tiang Sri Negara di Dewan Masyarakat Kerubong, ditu kemari.

Berebak enggau nya, iya ngelalau peranak seruran meri sukung ngagai Perintah Gempung Parti Sarawak ngambika mayuh agi agenda pemansang ulih dipejalai.

“Aku ngarapka kita meri kerejasama enggau sukung tegut ngambi perambu tu ulih dipejalai,” terang Len Talif.

Program lumba ti digulu 200 iku peranak nya diatur Raban Nembiak enggau Raban Indu Parti Pesaka Bumiputera Bersatu (PBB) Ranting Kerubong.

Program ti diatur berengkah ari 8 pagi nya entara program keterubah ti nerima sukung enggau kerejasama peranak dia nyengkaum ari Krapa.

Ba lansa sama, Tuai Rumah Lidang Empati madahka program keterubah tu asil kerejasama enggau sukung raban nembiak ba rumah panjai nya.

Ku iya, program lumba tu nyadi pelasar ngerapit sintal kaul peranak ba kandang menua nya.

“Piak pengatur nyendiaka bemacham program baka Pekit Sepak Takraw, Pekit Nganyam Ketupat, Pekit Ngirup Cola, Pekit Nyura Kategori Orang Tuai enggau Pekit Ngisi Ai Ngena Straw (Anak Mit),” ku Lidang nerang.