KUCHING: Terima kasih semua laban udah nulung kami sekumbang ke dituntung penusah deka pulai ke menua diri, ku siku ari raban krew ti bekuli di Romania Lorenzo Bakerfield Gani Baughman.

Lorenzo madahka, iya chukup beterima kasih ngagai genap sukung enggau bantu ti diberika rayat Malaysia lebuh sida ti napi penusah mulaika diri ngagai menua tu apin lama ke udah.

“Enda ulih dirintaika magang orang ti udah datai mantu bala kami. Terima Kasih Tuhan, kami semua udah selamat datai pulai ke menua, diperesa lalu kuarantin.

“Ngarapka semua kitai nyaga pengerai belama. Terima kasih ngagai semua kita ti bisi meri jaku peransang, kelebih agi ngagai bala krew enggau diri sebilik ti udah besampi ke kami. Terima kasih! Agi Idup Agi Ngelaban! Malaysia boleh!,” ku iya madah ba siti video pengelama seminit lebih, kemari.

Lorenzo ti mega ngarika krew rayat ari Sarawak, Sabah enggau Semenanjung ke sama bekuli di Romania madahka, iya mega meri terima kasih ngagai Perintah Sarawak ti udah mantu melanja ungkus kuarantin sereta peresa Covid-19 bala sida.

Apin lama ke udah, bisi 83 iku rayat menua tu diripotka tepagang gawa ba Kapal Bigfoot 1 di Romania ketegal dipejal gawa sereta diulun (nadai begaji) lalu dibai pulai ke Malaysia 9 November tu tadi enggau chara berenggat.

Nitih penerang siku sida ke gawa ba kapal nya, Andrian Ambas Richards, juluk sida pulai ke Malaysia nyadi nyata nengah bantu Datuk Seri Wan Junaidi ke berandau terus enggau Duta Malaysia di Romania, Tuan Yang Terutama Abdullah Zawawi Tahir enggau pemesai Konsul Amera.