SARATOK: Enam pintu peranak Rumah Uju di Senyawan,Krian ditu tegepang rambau dituntung penusah tanah tusur pagi kemari.

Ketuai Balai Bomba enggau Penyah Penusah (Bomba) Pampang Saratok,PPgB Nazry Mohamat madahka piak sida nerima kangau ari siku peranak rumah panjai benama Bajut Anak Ansi urung pukul 11.00 pagi ti madahka bisi tanah tusur nyadi ba belakang rumah iya.

“Lebuh datai ba palan penusah urung pukul 11.15 pagi, tiga iku bomba ari JBPM Saratok betuaika PBK II KUP Saliman Nin Ikral meda tanah tusur amat bisi nyadi urung takah tiga meter penyauh ari mua pintu belakang rumah Bajut Ansi.

“Taja pia, ari gaya perati enggau pansik silik ba palan penusah dia bomba ngenukuka tanah tusur nya apin tauka enda balat iga ngeruga pengelikun pendiau sida serumah jam kediatu.

“Enggau nya piak bomba ngelalau sereta nangkan peranak rumah panjai tau betelefon lalu ngaga ripot nuju piak bomba enggau lengkas nyema penusah nya agi nyadi,” ku iya madah ngagai Suara Sarawak.

Ngelansa pasal siti agi penusah ngiga orang lenyau di Semarang,Pusa,Nazry madah, sehari tu masuk hari ti kedua operasyen SAR dipejalaika begulai enggau piak polis, APM,RELA enggau peranak besemak.

Sida diati benung ngiga tudah Ra’obah Binti Morni,69 taun ke diripotka lenyau pagi 14 Nov pengudah nadai mulai kediri ari kebun.