KUCHING: Pengawa mulaika status nyadi bakih kunsi Sarawak di dalam Perintah Malaysia beguna dalam numbuhka pemun kuat dikena ngerapitka kaul tiga buah wilayah.

Presiden Gerempung Pemikir Dayak Sarawak (DTTAS) Elias Lipi Mat enggau mandal iya, Edward Awan madahka pengawa ‘nurunka pangkat’ status Sarawak ngagai sebuah negeri ba taun 1976 enda patut nyadi.

“Kitai deka status asal diberi baru ngagai negeri tu baka sempekat ti udah disetuju kena 1963.

“Nya alai, aram kitai sama meri sukung enggau bebendar ngulihka MA63 dipejalai atas pelasar enggau prinsip ngemajuka menua ngambika menua kitai lantang enggau mujur,” ku iya dalam siti penerang media ditu, kemari.

Sebedau tu, Parlimen ba taun 1976 udah ngubah enggau nukar status Sabah enggau Sarawak nyadi negeri ke-12 enggau ke-13 dalam Perintah Malaysia.

Enggau pindah ti dipejalai nya nyentukka diatu, Sabah enggau Sarawak diletak sebaris enggau negeri bukai dalam Perintah Tanah Melayu ti asal, sekali gus nandaka taraf ari bakih kunsi Perintah Tanah Melayu nurun.

Kelimpah ari nya, Elias madahka guna pemansang Sarawak patut diberi perati laban bisi pelilih menua enggau genturung agi tinggal ketegal perengka guna repuk.

Ku iya, pekara tu nyadi laban majoriti rayat ti diau ba menua pesisir agi idup seranta ketegal tinggal ari sukut pelajar, peneleba enggau dagang.

Maya nya mega, iya madahka akses jalai alun, infrastruktur pemun, pengerai enggau pelajar ti bekualiti kelebih agi rayat di menua pesisir patut diberi perati besai.

“Tu bereti pansut ‘ketidakseimbangan’ ari sukut pemansang wilayah.

“Kitai enda ulih bisi negeri ti tinggal laban reti ‘kemakmuran bersama’ meruan disebut, pekara nya patut diasaika semua rayat Malaysia ukai aja di Sabah enggau Sarawak,” ku iya.

Berebak enggau nya, Elias madahka Perintah Besai patut meri agih khas ngagai Sarawak, baka ba baruh Artikel 112 dalam Konstitusyen Malaysia.

“Nama formula ngulihka angka penyampau agih khas ba baruh Artikel 112D?

“Formula tu bedau nyemetak enggau bedau dipadahka, mesti bisi formula ngulihka agih khas patut diberi ngagai Sarawak nitihka Artikel 112D, Konstitusyen Malaysia,” ku iya.