KUCHING: Sida ti suah ngumbai sitak Pakan menua pemadu seranta di Malaysia patut datai meda kediri pemansang ti diasaika rayat di menua nya, ku Adun Pakan Tan Sri William Mawan Ikom.

Ku iya, Pakan ukai mega menua kelalu jauh ari mengeri laban semak pasar Sarikei urung 30 minit pejalai nengah jalai darat.

“Sida ti enda kala datai ke Pakan enda patut ninga berita bula lalu meragam munyi disebut ti semina deka ngemaruhka ketuai dia.

“Semua nya bula, sida empu patut datai ke Pakan kin,” ku iya.

Mawan bejaku munyi nya lebuh nyadi temuai dalam Program Twenty30 di TVS begulai enggau Dr. Jeniri Amir malam kemari.

Ku iya, orang enda patut nuduh sengapa sereta ngemaruhka sitak Pakan laban perintah mayuh meri pemansang ngagai sitak nya.

Tandu Mawan, Pakan tebilang enggau asil lada chelum enggau lada burak nitihka Banchi Ekonomi 2016.