KUCHING: Bansa Iban patut nyukung sereta meri kerejasama ngagai perintah ke diatu, ku Adun Pakan Tan Sri William Mawan Ikom.

Ku iya, lebuh napi pemansang dunya moden mayuh bengkah pekara nyadi isu politik dilansa mensia mayuh sebelah media rama.

“Bansa Iban diatu mayuh udah pandai lalu enda agi tinggal baka kelia.

“Kitai mega majak landik, bisi kualiti sereta sedia mantaika penemu diri empu sentang mayuh bengkah pekara,” ku iya.

Mawan bejaku munyi nya lebuh nyadi temuai dalam Program Twenty30 di TVS begulai enggau Dr. Jeniri Amir malam kemari.

Ku iya, penemu dipansutka bansa Iban jeman diatu ngelaika sida udah muka runding tang pekara nya patut dipantis enggau manah ngambi bisi tanggung pengawa ukai semina bepanggai ba pekara demokrasyen aja.