KUCHING: Inisiatif Palan Pematih Pengajar (IPG) Batu Lintang ngangkatka tikas penyulut nembiak ba subjek Sains, Teknologi, Matematik enggau Injinir (Stem) patut dipuji.

Menteri Pelajar, Sains enggau Pansik Teknologi Datuk Amar Michael Manyin Jawong madahka IPG nya udah ngatur program projek pemungkal subjek nya.

Ku iya, projek ungkup nembiak sekula primari enggau sekondari lebih agi ba menua pesisir nya endang patut nyadika peransang raban bukai.

“Batang tuju projek tu dekaka nembiak rindu belajarka Stem kelimpah nambahka peratus nembiak ari 23 ngagai peratus ke tinggi berapa taun udah tu.

“Pengangkun belajarka subjek tu beguna amat laban sida enda ulih nguasa subjek nya enti nadai ati belajarka subjek.

“Sida mesti meretika subjek nya ngambi bulih pemutus peresa ke manah,” ku iya.

Manyin mansutka jaku nya lebuh nerima penemuai basa ari Pengatur Program Stem ngagai selampur Sarawak, IPG Batu Lintang, ditu tadi.