KUCHING: Peranak Kampung Boyan, Gersik enggau Sourabaya berasai lantang ati pengudah juluk nerima arus penyambung ke deras deka nyadi nyata.

Sebana peranak ditu udah nerima perati ari Adun Pantai Damai, Datuk Dr Abdul Rahman Junaidi enggau Telekom Malaysia ™ beduduk ari penanggul arus penyambung ti enda deras sebedau tu.

Ku Menteri Muda Utiliti (Bekal Ai) nya, peranak ditu udah nerima servis Unifi pengudah TM bejalaika inisiatif masang kabel gentian optik.

“Pengawa masang kabel nya deka ngemuntangka peranak ditu ngelakuka produk sida nengah online enggau bala temuai tauka pengusung ulih ngena arus penyambung ke deras agi ditu.

“Kebuah pia laban, pemakai asal Sarawak baka kek lapis, ikan terubok masin sereta kuih udah ngasuh endur nya suah dilawa pengusung.

“Nya alai, bala pengusung mega deka nganjung gambar ke ngerinduka ati ngagai bala bakih tauka bala iya ke diau ba nengeri bukai tauka menua luar,” terang Dr Abdul Rahman.

Dr Abdul Rahman ti mega Menteri Muda ba Opis Kepala Menteri (Pekara Islam enggau DBKU) madahka pengawa masang kabel tu deka meri pemaik ngagai bala nembiak maya pandemik tu.

“Arus penyambung tu meri pengelebih ngagai bala nembiak nembuka kereja sekula sida enggau belajar nengah online.

“Kitai nemu semua nembiak deka belajar nengah online maya pandemik tu lalu arus penyambung ti deras ngemuntang sida maya belajar,” terang Dr Abdul Rahman.

Iya mega meri terima kasih ngagai TM laban udah nyendiaka Unifi ba kandang menua nya.