KUALA LUMPUR: Semua sekula sekondari enggau buding ba sitak Parlimen Lawas agi diguna baka selama lalu nadai penanggul sekut endur nembiak belajar.

Sapit Menteri Pendidikan I Muslimin Yahaya madahka naka diatu, sekula ulih nangkup peminta entara 68 ngagai 85 peratus seraya buding entara 68.5 ngagai 92 peratus.

“Opis Menteri Pelajar (KPM) udah nyendiaka empat buah sekula sekondari Perintah (SMK) ungkup peranak din baka SMK Lawas, SMK Merapok, SMK Trusan enggau SMK Sundar.

“Ari penyampau nya, tiga buah sekula disikap ngena buding ungkup nembiak ke datai menua jauh ari sekula.

“Semua kelas diatur muakka pagi lalu endur belajar mega lantang enggau meruan sereta agi diguna baka selama,” ku iya lebuh nyaut tanya ba Aum Parlimen, tadi.

Muslimin nyaut tanya Baru Bian (PSB-Selangau) ti deka nemu status pemadu baru perambu ngaga SMK Long Semado, enggau langgur belanja RM35 juta, baka dibantaika Menteri Pengeluar Kuasa, Teknologi Gadung enggau Ai lebuh nya sebedau Pengawa Bepilih Nengeri (PRN) Sarawak 2016.

Berindik ari nya, Muslimin madahka bedau bisi pematut numbuhka sekula sekondari baru ba sitak Parlimen Lawas diatu nyengkaum ngaga SMK Long Semado.

Iya madahka pemutus nya digaga bepelasarka penerang nembiak masuk sekula ari 2017 nyentuk 2019 ari KPM nengah Opis Pelajar Nengeri (JPN) Sarawak, ngambi beratika patut tauka enda ngaga SMK Long Semado.

“Enti sema bisi pematut enggau peminta ngaga sekula baru dudi hari, KPM deka bejalaika pengawa nitihka pematut ungkup tuju nya,” ku iya nyemetak madah. — BERNAMA