LIGA Kapit 2021 disadang richah agi enggau lanchar dipejalai dibanding sebedau tu.

Pekara tu beduduk ari pekit nya deka ngena Stadium Mit Kapit ti baru dikemanah.

Presiden Serakup Main Bol Bagi Menua Kapit (KAPFA), Nicol Agoi madahka Stadium Mit Kapit baru tembu dikemanah lalu sida ngadang ngena nya nyadika padang.

“Stadium Mit Kapit entara padang ti deka dikena maya ngatur Liga Kapit 2021 ila.

“Kami andalka pekit minggu baru deka richah agi laban mayuh tim deka masuk pekit tu,” terang Nicol ngagai pemberita Suara Sarawak.

Ku iya, sida ransing agi ngatur pekit dudi hari ngambi nempa pemain ti landik diangkat ngagai renggat ke tinggi agi.

Reti iya, bisi pemain ari kandang menua nya deka ngarika tiga skuad menua (Sarawak United FC, Sarawak United II/Piala Presiden enggau Sarawak United III/Piala Belia) dudi hari.

Nambahka nya, Nicol ngaku sida mega merambu ngatur pekit bukai ngambi ngeranchakka agi program sepanjai taun KAPFA.

Tu nyengkaum futsal, kus jurulatih, kus referee enggau ke bukai nyengkaum pekit renggat nembiak.