LUBOK ANTU: Kaban Parlimen (MP) Lubok Antu Jugah Muyang merambu mutarka penanggul nadai penyambung internet di Nanga Sumpa ngena Sistem Connectme.

Ku iya, iya udah berandau begulai enggau raban Connectme Sarawak dikena nyambung internet lalu ngemuntangka pengawa peranak ba menua nya kelebih agi bala nembiak sekula.

“Inisiatif ke ulih digaga diatu iya nya meli ke sida tu software ari Connectme nya dikena nyambung internet ba endur sida.

“Inisiatif tu tau dikumbai kitai ungkup timpuh pandak sereta panjai laban seagi internet bedau ulih datai ba din, peranak menua tu nadai pilih bukai tang ngena sistem tu,” ku iya lebuh dirandau Suara Sarawak, kemari.

Nangkanka nya ku iya, piak iya udah nyanggup meli software ti diungkupka ngagai pekara nya.

“Naka tu kami agi berundingka pengelebih sereta pengurang ngena Connectme tu.

“Aku mega deka betemu lalu berandau enggau peranak genturung pendiau tu bekaul enggau pekara tu ila,” ku iya.

Kelimpah ari nya, Jugah madah endang udah bisi tiang telekomunikasyen didirika beserimbai enggau menua nya, tang pengawa nirika tiang nya enda diseretaka enggau piring dikena ngulihka arus telefon.

Iya mega madahka kelimpah ari Nanga Sumpa, bisi lebih 60 genturung pendiau ba sitak nya begunaka pekara ke sama.

“Bisi pemar ari ngena Connectme tu. Bisi sekeda menua apin nerima bekal karan lalu ngena sistem solar lalu enti ngena solar, ungkus nya enda disengkaum enggau sistem Connectme.

“Kelimpah ari nya, Connectme tu ngena sistem ‘top-up’. Enti kami ulih nyendiaka ungkus masang sereta nyendiaka semua nya, tang ulih tauka enda peranak ke bekaul nya mayar ungkus top-up tu?,” ku iya.

Jugah mega madahka penanggul ti ditapi peranak Lubok Antu kelebih agi sida ke napi penanggul nadai servis internet tu deka seruran dibantaika iya ngagai Perintah Besai.

Ku iya, pelilih Lubok Antu enda tau tinggal ari ngasaika pemansang digital baka ke benung diasaika pelilih bukai diatu.

Kena 15 November tu tadi, ba Facebook Nanga Sumpa, Lubok Antu Sarawak mantaika gambar enggau penerang bekaul enggau 20 iku nembiak ari Nanga Sumpa enggau Nanga Jambu bejalai kaki pengelama dua jam sereta niki bukit ngulihka internet.

Nitihka penerang nya, nya dikena bala nembiak nembuka kereja sekula sida nengah tali arus berindik ari pengerekai igi penyakit Covid-19 di Malaysia lalu pekara nya nerima perati rayat Sarawak.