KAPIT: Anang bangat nagang tudah rayat menua pesisir ke deka bejualka asil kampung, pia ku Adun Bukit Goram Jefferson Jamit Unyat.

Iya ngarapka raban penerit adat anang kelalu terit lebuh bejalaika atur ngagai rayat ari menua pesisir ti bejualka asil ari kampung baka jani kampung.

Ku iya, asil ulih begiga dalam kampung nya nyadi penatai pemisi rayat menua pesisir.

“Asil ari kampung tu mih nyadika anak belanja dikena melanja anak ti agi besekula sereta ngidupka diri.

“Pia mega, asil ari kampung tu lama udah nyadi pengawa peranak menua pesisir ngulihka belanja.

“Mayuh bala ke bedaja ba tamu bepanggai ba asil nyual babi kampung, ikan enggau sayur.

“Anang beambi ulih bekaul pekara tu sereta anang nabur berita selebubu ngapa,” ku iya nyemetak madah.

Nambahka nya, Jefferson madahka diri udah nerima mayuh sebana ari rayat ba Kapit empai lama ke udah.

Nya alai ku iya, pekara baka tu patut diperati enggau silik agi ngambi ulih mantu rayat menua pesisir.

Nitihka Ordinan Perlindungan Hidupan Liar 1998, peranak asal ba menua nya semina ulih begigaka asil jelu ungkup ke dempa diri empu lalu ukai ke dijual.