SERIAN: Pengawa nutup adan menua ketegal pengerekai Covid-19 enda nagang kerejasama dagang entara Malaysia enggau Jipun, Korea Selatan enggau Taiwan.

Duta Khas Menteri Besai Ke Asia Timur Datuk Sri (Dr) Richard Riot Jaem madah, iya udah ngatur mayuh randau lalu betemu enggau duta besai ari tiga menua nya.

“Aku nyadi duta khas tikas menteri ngagai Jipun, Korea Selatan enggau Taiwan apin bisi awak nemuai ngagai menua nya laban adan menua agi ditutup ketegal Covid-19.

“Taja pia, aku neruska randau nyengkaum ngena randau video ngambi nambahka agi beranakka puku ari menua nya taja napi pemar ari sukut ekonomi,” terang iya.

Riot ti mega Kaban Parlimen Serian mansutka jaku nya lebuh dirandau pemberita pengudah bejadika pengawa nyeleti palan paking kerita Sekula Sekondari Perintah (SMK) Serian, kemari.