KUCHING: Nembiak umur dua taun entara siku ari enam kes baru kena rampit Covid-19 ngaul Kluster Besi ngujungka bisi 11 iku nyengkaum kes indeks.

Naka 12 tengahari kemari, bisi 301 iku udah diperesa ke alai 11 kes ditemu positif (enam kes baru), 284 iku negatif enggau enam iku agi nganti pemutus.

Sekretariat Komiti Penyangga Penusah Ngenyit Nengeri Sarawak (JPBNS) madahka Sarawak ngerikod lapan kes baru nya enam kes ba Kuching enggau dua kes ba Miri ngujungka kes nambah ngagai 1,053.

Ku iya, kes ke 1046 nya siku nembiak lelaki pulai ari Kuala Lumpur enggau sangkai ba Padang Bilun Miri enggau udah dipasuk ba palan kuarantin pengelama 14 hari.

Pia mega ku iya, kes ke 1047 nya siku indu peranak menua ditemu positif nengah pengawa nyidi kontak semak iya nya kes ke 987 enggau menyadi indu k eke 987 tu tadi.

Bekaul enam kes baru ba Pelilih Kuching nya, kes ke-1048 ngagai 1053 nya diri sebilik ti diau sebilik enggau bisi kontak semak ngagai kes ke-1043 enggau 1044 sereta semua sida udah dipasuk ba wad isolasyen Sepital Besai Sarawak (SGH).

Semua kes nya peranak menua ti mega apai, indai, diri menyadi enggau anak menyadi ngagai kes ke-1043 enggau 1044 ke alai sida tu siku lelaki enggau lima iku indu beumur dua ngagai 56 taun.

Naka kemari, bisi enam kluster agi ngerekai baka Kluster Besi, Kluster Jalan Abell, Kluster Baki, Kluster Seladah, Kluster Greenhill enggau Kluster Wisma Saberkas.

Kemari, 16 kes baru udah suman enggau dikemendar pansut ari sepital ngujungka kes suman nambah ngagai 962 iku tauka 91.36 peratus.

Bisi 72 iku agi diperubat ba wad isolasyen ke alai 63 kes ba SGH enggau semilan kes ba Sepital Miri lalu siti kes agi begunaka kereban kena enseput ba SGH.

21 PUI baru dirikodka enggau dua PUI agi nganti pemutus makmal seraya kes pemati mengkang 19 iku tauka 1.80 peratus.