SIBU: Serakup Dayak Iban Sarawak (Sadia) Pampang Rajang ditu deka bekerejasama enggau Opis Pengerejister Bansa (JPN) mutarka penanggul peranak ti nadai tingki.

Chairman iya, Bill Jugah madahka pengawa nya dikemujur nengah kaunter mindah kin kitu kena 15 ngagai 17 Januari 2021.

Jugah madahka kaunter tu deka diatur ba Restoren Kampung Budaya Malaysia seberai Taman Jubilee Bukit Aup, berengkah ari pukul 8 pagi nyentuk pukul 5 lemai.

“Aku udah berandau enggau ketuai seksyen, peranak menua engau operasyen JPN Pampang Sibu ba sebuah hotel tebilang, apin lama ke udah.

“Randau nya mega digulu Direktor JPN Sarawak, Abang Noraffian Abang Ibrahim,” ku iya lebuh dirandau, ditu kemari.

Iya madahka kaunter mindah kin kitu deka diatur ba palan nya penyauh urung tujuh kilometer ari Sibu.

Lebuh nyendiaka servis kaunter mindah kin kitu, iya andalka pengawa nyaga takah sereta nitihka Atur Pengawa Standard (SOP) ke bukai ulih dititih laban endur nya besai.

“Sida ti datai ari jauh baka ba Ba’kelalan, Long Singut tauka kandang menua bukai dilalau datai tumu.

“Kebuah pia laban sida deka diasuh dulu nerima servis nya kena 15 Januari tu.

“Peranak semak Sibu enggau ngelingi kandang menua nya dipinta datai kia kena 16 ngagai 17 Januari tu.
“Kami merambu jam ngatur servis nya dilanjar pengelama tiga hari nya enti sema nerima mayuh orang,” terang Jugah.
Ku Jugah, Sibu nya nyadi palan pemungkal program tu.

Udah tu ku iya, sida merambu ngatur program baka tu ba Pelilih Tatau.

“Nangkanka nya, palan bukai deka diperunding ngatur program ke sebaka dudi hari nitihka peminta.

“Nya alai, aku ngelalau sida ti bisi penanggul bekaul enggau atur JPN ngambi anang masau peluang tu kelebih agi tu program keterubah kami ba Sibu,” terang Jugah silik agi.

Ngelansa silik, Jugah madahka program nya diatur pechuma kelai pengeransing Sadia Pampang Rajang dekaka peranak asal bulih tingki.

“Kami nadai ngira gerempung ukai dikuasa perintah (NGO), sekalika NGO China, Melayu enggau ke bukai tau datai maya nya ila,” ku iya.

Iya ngelalau sida ti bisi penanggul nadai tingki dipinta datai tumu maya program ba Sibu ngambi dirikod enggau JPN lalu ngemuntangka atur bukai udah nya.

“Kitai datai dulu kitu taja nadai mai sebarang dokumen ngambika JPN ngerikodka penatai kita.

“Udah nya, nama kita dipasuk dalam rintai sida ngambi ngemuntangka atur bukai pengudah sida nerima kangau ari sida ila.

“Kami ngarapka servis kaunter mindah kin kitu lanchar dipejalai lalu barang sapa ti bisi penanggul enggau atur JPN tu, tau telefon ngagai aku ba lumur, 016-8751119,” ku Jugah.