KUCHING: Bisi semilan kes baru Covid-19 udah suman sereta dikemendarka pansut ari sepital dirikodka ba Sarawak sehari tu ti ngujungka kes suman sereta dikemendarka pansut ari sepital nambah 971 iku.

Komiti Penyangga Penusah Ngenyit Negeri (JPBN) madahka tujuh kes suman sereta dikemendarka pansut ari sepital tu dirikodka ari Sepital Besai Sarawak lalu dua agi kes dirikodka ba Sepital Miri.

Naka tu, bisi 65 iku pesakit agi diperubat ba sepital iya nya 57 iku ba Sepital Besai Sarawak enggau lapan iku di Sepital Miri.

Taja pia, nadai kes Covid-19 benung diperubat ba Unit Sakit Raya (ICU) ti ngujungka penyampau pemati ketegal Covid-19 agi mengkang 19 iku.

Kemari mega, JPBN ngerikodka lapan Pesakit Agi Dipatau (PUI) tang nadai kes nganti peresa makmal.

Nitihka ripot ari JPBN, bisi dua kes positif baru Covid-19 dirikodka ba Sarawak kemari iya nya siti kes ditemu ba Kuching enggau siti kes ditemu ba Miri.

Nya ngujungka penyampau kes positif Covid-19 di menua tu nambah ngagai 1,055 kes.

Kes ke-1,054 siku lelaki menua ti gawa nyadi eksekutif teknikal sebuah serikat minyak enggau gis ti bepengkalan di Miri.

Iya ditemu positif ari peresa bala mayuh ti dipejalaika Opis Pengerai Bagi Menua Miri ba sekeda palan gawa di Miri pun bulan tu tadi.

Nangkan nya, siti agi kes ba Kuching tauka kes ke-1,055 mega siku lelaki menua ke ngembuan kaul rapat enggau kes ke-1,051.

Kes diperesa ketegal bekaul rapat enggau kes postif ari Kluster Besi kena 19 November lalu pemutus madahka iya positif.

Kes nadai nunjukka sebarang tanda kena rampit Covid-19 sereta nadai ngembuan sejarah kala nemuai ngagai menua luar tauka ngelawa palan ti bisi kes Covid-19 dalam timpuh tiga bulan ke udah.

Pengawa ngiga orang kontak rapat enggau dua kes tu benung dipejalai.