SIBU: Titi repuk ngelawa Sungai Rassau ditu udah tembu diseleti pengudah dibantai ba surat kabar tu kena 29 Oktober tu tadi.
Raban Kaunsil Pelilih Matu-Daro (MDMD) ti bempu tanggungpengawa ba Sungai Rassau, Kaunsilor Juti Bilun madahka titi nya udah tembu diseleti minggu nyin kemari.

“Kunteriktor MDMD udah nyeleti titi nya pengudah berita pasal titi ti repuk tu dikeluar ba surat kabar Suara Sarawak enggau media rama.

“Udah nya, Gempung Parti Sarawak (GPS) kelebih agi PBB Pampang N.53 Bawang Assan udah meresa ngambika pengawa nyeleti dipejalai,” ku iya lebuh dirandau pemberita Suara Sarawak, ditu kemari.

Juti madahka, pengawa nyeleti jematan pemanjai urung 200 meter nya digaga pengelama tiga hari enggau beungkus RM88,000.

“Penembu titi nya pulaika pemanah ngagai semilan buah rumah panjai, dua buah sekula enggau sebuah tadika enggau gerija,” terang Juti.

Iya madahka penanggul tu udah dibantai ngagai sida kenyau ari pun taun 2019.

Taja pia ku iya, penanggul nya nadai dputar dataika penanggul nya dikeluar ba Suara Sarawak kena 29 Oktober tu tadi.

TUAI RUMAH SALIM UNANG

Nangkanka nya, Tuai Rumah Salim Unang ngarika sida serumah meri besai terima kasih ngagai GPS kelebih agi PBB Pampang Bawang Assan laban chakah mutarka penanggul tu.

Iya mega meri terima kasih ngagai Juti laban udah mantaika penanggul tu lalu nerima perati MDMD.
“Taja kami ba sitak Dun Bawang Assan tang, sitak kami mengkang dipegai MDMD.

“Lebih 1,000 iku peranak ngasaika pengelantang pengudah titi tu tembu diseleti.

“Titi tu ulih dikena ngelawa sebuah rumah panjai nuju rumah panjai ke bukai nyengkaum sekula, gerija enggau tabika,” ku Tuai Rumah Salim.

Tuai Rumah Salim madahka sida agi begunaka pemansang bukai baka perengkaguna pemun, infrastruktur, arus penyambung enggau bantu nyeleti rumah.

“Aku minta GPS anang ngelaungka kami ditu taja kami duai ba menua ulu entigis.

“Dikearap udah tu kami ukai semina nerima jematan mit aja tang mayuh agi pemansang bukai deka majak dipejalai ba sitak Sungai Rassau tu,” ku Salim.

Iya dekaka GPS seruran ngenatika pekara diguna rayat ba sitak Sungai Rassau tu laban sida udah jauh tinggal pemansang kenyau ari 25 taun ke udah.

Berebak enggau nya, Salim mega madahka kandang menua sida nya pemadu seranta dalam Dun Bawang Assan.

“Kami inginka pengari rayat ari GPS nentuka pemerinsa ditapi kami ditu ulih diputar pengari rayat ari perintah.

“Pengari rayat kami ditu ari penyakal enggau aku nadai pengandal sida ulih gawaka rayat enggau manah,” ku iya sebana.

Sungai Rassau nya penyauh urung sejam 30 minit pejalai ngena jalai ai ari Sibu.

NADAI LIKUN… Gaya titi ke balat repuk dikena ngelawa Sungai Rassau sebedau tu.