KUCHING: Kaunsil Multimedia Sarawak (SMA) deka nyikap Terminal Aperture Mini (VSAT) ba sitak diselinting ngambi mantu nembiak sekula ba menua pesisir bulih arus penyambung ke deras agi.

SMA ba sebengkah penerang madahka nya entara inisiatif nentuka nembiak ba Nanga Sumpa enggau Nanga Jambu di Lubok Antu disikap arus penyambung ke deras ngambika sida ulih belajar.

“Kami sedarka penanggul arus penyambung tu majak meri empas ketegal pengerekai Covid-19 enggau Atur Mindah Betagang (PKP).

“Taja pia, SMA deka nirika tiang pemanchar ba endur ke nadai komersial,” ku penerang nya.

Ku penerang nya, SMA mega bejalaika inisiatif Transfomasyen Menua Pesisir Sarawak Multimedia Authority (SMART) ngambi nambahka bungkur arus penyambung ngagai menua pesisir Sarawak.

“SMART nya entara inisiatif intervensyen menua dikena ngurangka takah ekonomi rama komuniti menua pesisir.

“Pengawa nirika 300 tiang pemanchar keterubah diatu udah tembu 67 peratus,” ku penerang nya.