SARATOK: Ba Aum Kunsil Nengeri (Dun) tu tadi, sekeda perambu enggau tanya udah dibantaika Adun Krian, Ali Biju ungkup projek pemansang sitak dipegai iya.

Peminta nya nentuka pemansang ekonomi rama ranchak agi dipejalai ke alai sekeda projek diperambu enda tau enda dirumban laban ngaul pengelantang rayat.

Opis Pelilih Mit Nanga Budu

 

Ali udah minta penerang silik ari Perintah Sarawak pasal status projek tu ke alai iya dipadahka taba opis tu berubah ari taba asal.

Iya mega udah minta projek tu dipejalai enggau lengkas laban udah lama betangguh lalu rayat dia begunaka servis ba opis nya.

Sida ke diau ba Nanga Budu diatu alah enda ngelawa Opis Pelilih Saratok ke umbas penyauh lalu begunaka belanja besai.

Udah opis pelilih mit tu tembu ila, rayat ukai semina muntang ngaduka dokumen diguna tang mega ulih ngelimat jam enggau belanja.

Projek Bekal Ai

Iya mega udah nanyaka perambu Perintah Sarawak bejalaika projek bekal ai beresi ungkup kandang menua Mudung Ibus, Brayang, Ulu Roban enggau Ulu Sebetan.

Ali nerima penerang madahka projek tu deka berengkah dipejalai udah projek Jalai Besai Pan Borneo dia tembu.

Nya alai iya deka nemu sekalika projek tu agi dalam perambu lalu kemaya haribulan ditetapka ungkup bejalaika projek ke bendar.

Projek Jalai Alun

 

Ngena peluang nya, Ali udah mantaika peminta ngaga jalai penyambung rumah panjai ke apin disambung ngena infrastruktur pemun nya.

Projek ngaga jalai ngelawa Rumah Layang, Nanga Ibus, Rumah Luang, Ulu Roban enggau Rumah Augistine, Empayak udah dibantai lalu diatu nganti pemutus perintah ngemendarka nya.

Ku iya, peranak dia suah udah nagih ngambi peminta sida nya diperatika perintah lalu agih belanja dikemendar.

Sistem Parit enggau Entali Ai

Nambahka nya, Ali minta agih belanja ke chukup dikena ngintu sistem parit enggau entali ai ba genturung pendiau suah ampuh bah.

Tu nyengkaum ba Kampung Kupang, Kampung Sungai Endot, Kampung Sesang, Kampung Nyabor, Kampung Gerigat enggau Empayang.

Nya alai iya ngansak Opis Entali Ai engga Parit Sarawak nempa kaul kerejasama enggau Opis Menteri Rampa Menua enggau Ai Malaysia (Kasa) ungkup pengawa ngintu nya.

Projek Melakin Jalai

Kelimpah ari jalai penyambung ngelawa genturung pendiau enggau rumah panjai, Ali mega minta Opis Kereja Raya (JKR) Sarawak ngemasukka Projek Melakin Jalai Ulu Awik dalam rintai projek diberi pemerat ngagai Perintah Besai.

Enti projek tu udah dibai ngagai Perintah Besai, dia kitai deka muntang agi bepintaka agih belanja dikena ngemujurka peminta rayat tu.

Projek tu dikearap ulih tembu enggau jampat baka dikeandalka peranak dia ngelama tu ti deka bisi sambung jalai ke meruan agi kelimpah bejalaika program ekonomi bukai baka bekebun.

Projek Arus Penyambung

 

Nentuka kandang menua Saratok nerima arus penyambung (internet) enggau sambung telefon deras, Ali udah minta penerang silik pasal pengawa nirika 20 tiang pemanchar telekomunikasyen ti deka didirika di menua nya.

Iya besai amat pengandal udah tiang pemanchar tembu didiri jemah, rayat ulih ngasaika pengelantang enggau penguntung ari pemisi infrastruktur penyambung nya.

Arus penyambung beguna amat diatu berindik ari pengerekai igi penyakit Covid-19 ti mai nyau deka serap umur begunaka teknologi lebuh ngatur pengawa.

Ambika chunto, ari nembiak tadika nyentuk sida ke bedagang begunaka arus penyambung tauka internet ba mayuh bengkah pengawa enggau tuju.

Jalai Kebun

Ali mega bisi minta agih belanja ungkup pengawa ngintu tauka ngemanahka jalai kebun ba sitak N.39 Krian.

Iya madahka agih belanja nya beguna amat dikena nyaup bala pekebun mit ngaga jalai ke meruan ngelawa kebun kin.

Jalai tu deka ngemuntangka kereja ngambi enggau mai asil kebun ke dijual lalu tu ulih nyungkak ekonomi pekebun mit di menua pesisir.

Tambah mega ku Ali, kandang menua nya diatu nerima projek betanamka buah rian Musang King enggau Black Ton sereta Lia Bentong Fertigasyen bedandang ti dikereja begempung.