Band D’Crystal terus nyingkang ba dunya pemerindang lagu Iban lalu berita ke pemadu baru ari sida udah mujur ngeluarka siti agi lagu baru diberi nama ‘Atas Nama Pengerindu’.

Lagu tu berentak genre balada tu nyeritaka penusah ati siku lelaki ti puntan pengerindu laban enda diasuh jadi enggau indu dikesayau iya. Tudah ditagang apai enggau indai jadi enggau indu nya ketegal enda sama bansa enggau pengarap.

“Ketegal penyayau iya mutus ati beserara sereta meri awak ngagai pangan indu iya nya jadi enggau lelaki bukai ngichaka pengidup indu nya tau lantang agi jemah.

“Mai ati sinu tudah mega sanggup datai mua ngesah hari besai maya ‘tembawai lama’ iya nya rami melah pinang,” ku Harry ti mega ketuai raban Band D’Crystal lebuh dirandau Suara Sarawak.

Nangkan nya, ku tandu Harry leka lagu ‘Atas Nama Pengerindu’ ditengkebang Maxwell John Pagang lalu tiun digaga raban D’Crystal empu. Lagu tu udah dipeda sepenyampau 60, 000 iku mensia kenyau hari keterubah dipasuk ba channel Youtube kena 25 September tu tadi.

RABAN D’CRYSTAL…Benung merindang ba sebengkah pengerami di Sibu.

“Music Video (MV) lagu tu mega asil ari keranjai jari siku videographer ti chukup landik benama Sydney Atin,”ku iya.

Peneleba lapan taun ba dunya pemerindang lepas ditumbuh ba taun 2012, bisi lima iku sida sebakih dalam band tu iya nya Harry (Vokalis),Pierce (Pemain Gitar), Beritin (Ketuai Pemain Gitar), Cyril (Pemain Gitar Bas) enggau Sheldon (Pemain Drum).

Sida sebuat ngerikod lagu dibaruh chap Kaban Muzik Production (KMP) ke bepalan ba Kuching berengkah ari bulan Mac 2018.

Naka tu bandk sida mujur ngeluarka tiga buah lagu diberi nama Kemayang Nuan (2018), Jera Aku (2018), Nadai Reti Agi (2019) lalu pemadu baru Atas Nama Pengerindu (2020).

Band tu kala nyadi masuk final pekit Anugerah Carta Sapa Juara taun 2019 tang dikelala enggau nama Sri Sibu. Sida mega suah dikangau merindang ba program diatur Polis Diraja Malaysia (PDRM).

Band asal diarika tujuh iku sida ti bela gawa nyadi polis ba Indu Opis Polis (IPD) Sibu betuaika ASP Yuthri Ahmad Nadzri.

Enda lama udah nya, tim band direrak lalu ngena nama D’Cyrtal betuaika Sarjan Zubairy (Harry) lepas ASP Yuthri pindah. Band tu terus beretan ari 2014 nyentuk diatu.

SEDIA DIKANGAU MERINDANG…D’Crystal sedia dikanggau merindang ba sebarang program tauka pengerami.

“Arapka band tu terus beretan sereta nyaup ngangkatka nama industri muzik Iban,”ku Harry.

Band tu sudah dikanggai merindang ba pengerami makai lemai, melah pinang, palan pemerindang bemacham program baka Pengerami Dayak BDCF di Sibu.

Nangkan nya kami kala dikangau merindang ba Konsert Merindang Ke Bintang diatur Raban Masterpiece, ku Harry.

Pemujur pemadu tinggi dijapai band D’Cyrstal iya mujur masuk renggat final pekit ACSJ 2019, bulih gelar band tebilang ari KMP, champion pekit Carta Sapa Juara (CSJ) ba Stesyen Radio WaiFm tiga minggu bejurut sereta beretan pengelama 26 minggu ba Carta Lagu Tebilang CatsFm.

Sebarang aktiviti tauka lagu baru Band D’Cyrstal ulih dipeda ba Channel iTunes, Joox, Deexer, KKbox enggau Youtube Band D’Cyrstal Official tauka Facebook DCyrstal Band DC.

LANSA
BIODATA RABAN D’CRYSTAL

1.Harry – Vokalis
Umur : 33 Taun
Asal : Kuching
Gawa : Polis
Facebook: Harry D’Crystal & Harry D’Crystal ll

2.Pierce -Pemain Gitar
Umur : 30 taun
Asal : Sibu
Gawa : Kerani
Facebook : Pierce Lee

3.Beritin -Ketuai Pemain Gitar
Umur : 49 Taun
Asal : Saratok
Gawa : Prinsipal
Facebook : Beritin DC

4.Cyril -Pemain Bass
Umur : 43 taun
Asal : Sibu
Gawa : Staf Opis Pengerai
Facebook : Bezbass Cyril

5.Sheldon – Pemain Drum
Umur : 24 Taun
Asal : Saratok
Pengawa : Luyar
Facebook : Sheldon Assom