KAPIT: Kepala Pengajar enggau bala pengajar Sekula Primari (SK) Nanga Oyan, Kapit sanggup nengah jalai ai pengelama 45 minit lebuh nganjung kereja sekula ngagai bala nembiak ba rumah panjai.

Berindik ari nya, Kepala Pengajar Mohammad bin Mobun udah bejalaika Program Ruai-Based Learning (RBL) sekumbang timpuh Atur Mindah Betagang Penyuman (PKPP) tu.

Ba program tu, bisi 14 iku pengajar enggau lapan iku staf nyengkaum Mohammad empu udah ngabas nembiak ba rumah panjai ngena jalai ai penyauh 36 kilometer.

Pia mega ku Mohammad, sida sebuat ngajar empat subjek baka Bahasa Melayu, English, Matematik enggau Sains.

Lebuh dirandau, Mohammad madahka sida sebuat keran mantu nembiak ba rumah panjai ngambi sida enda tinggal pelajar taja napi penanggul arus penyambung.

SEDIA MANTU… Bala pengajar enggau staf SK Nanga Oyan baru sangkai ba rumah panjai ti dituju.

“Aku teulihka buah runding bejalaika program tu laban berundingka penanggul ditapi nembiak ketegal penanggul arus penyambung di menua ulu.

“Nya kebuah, kami sebuat keran ngabas sereta meri kereja sekula ngagai nembiak ngambi sida semampai belajar ba rumah taja sekula ditutup.

“Pengelaju perau nitihka peneras ai, enti ai besai kami deka laju agi maya undur ke ili.

“Kami mega deka bebatak perau enti ai langkang maya nganjung kereja sekula ngagai nembiak ba rumah panjai,” ku Mohammad.

“Genap rumah panjai digusung kami bebida nitihka penyauh iya lalu rumah panjai pemadu jauh nya urung 30 kilometer dilawa kami ngena perau iya nya penyauh 45 minit.

ENGKAH DITU… Siku pengari ba rumah panjai diasuh ngambi enggau nganjung kereja sekula nembiak ba kutak ti udah disedia dikumbai Drop Zone.

Sida Mohammad sebuat udah nganjung kereja sekula ngagai bala nembiak ba rumah panjai kena Hari Empat tu tadi.

Pia mega ku iya, pengawa nyadung kereja sekula dibagi nitihka zon ke alai Zon 1 nuju ili sekula baka ngagai Rumah Bangkong enggau Rumah Weng sereta nuju Rumah Nawin ke ba seberai sekula.

Terang iya, Zon 2 mudik Sungai Oyan nuju Rumah Jimmy Jarraw enggau Rumah Lumpun.

“Zon 3 mudik ke ulu nuju Rumah Dawin, Rumah Peter, Rumah Sengiang, Rumah Nisson enggau Rumah Along.

“Nyadi, semua rumah panjai tu ba tebing Sungai Mujong, Kapit.

“Maya program tu, bala nembiak deka belajar enggau ngaga latih ti disediaka pengajar sida ba ruai ninting hari nitihka taga jam ti udah ditetapka sekula” terang iya.

Berebak enggau nya ku iya, siku pengari rumah panjai ti dichiri diasuh matau nembiak belajar ba ruai.

Ku Mohammad, pengari nya mega deka ngambi enggau nganjung kereja sekula ti udah diengkah ba Drop Zone ngambi diperesa bala pengajar ninting Hari Satu.

Ba lansa bukai, Mohammad madahka program tu ungkup renggat keterubah lalu deka disambung ngagai renggat kedua dudi hari.

“Program tu baru ba renggat keterubah endur kami beratika pemanah program nengah kerejasama apai indai enggau komuniti rumah panjai sentang tanggung pengawa sida sama ngemujurka program Ruai Based Learning tu.

“Ba renggat kedua, kami deka beratika pemar bejalaika program tu lalu renggat ketiga nya dikena kami ngemanah program tu ngambi meri pemaik ngagai bala nembiak ba rumah panjai,” terang iya.

“Enggau peluang tu, aku meri besai terima kasih ngagai bala pengajar, staf enggau peranak rumah panjai laban udah ngemujurka Program RBL tu.

“Aku ngarapka kerejasama entara raban sekula enggau apai indai dalam Kerejasama Apai Indai enggau Komuniti (PIBK) ulih nyapai tuju program ti udah dipejalai,” ku Mohammad nyimpul randau enggau pemberita Suara Sarawak.