KUCHING: Bisi enam Palan Pengintu Pengerai Dalam Komuniti (PDK), dua Palan Aktiviti Orang Tuai (PAWE) enggau dua Palan Servis Orang Tuai (PPWE) nerima geran tambah penyampau RM50,000.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Seri Fatimah Abdullah madahka kelimpah PDK, PAWE enggau PPWE geran tambah tu mega diberi ngagai sebuah gerempung ukai dikuasa perintah (NGO) ke dikumbai Palan Hun Nam Siang Tng penyampau RM10,000.

“Geran penyampau RM5,000 ungkup sebuah palan diberi ngagai PAWE Sri Satok, PAWE Kuching, PPWE Kuching, PPWE Petra Jaya, PDK Sinar Harapan Baru, PDK Sri Batu Kawah , PDK Mutiara Hati Matang, PDK Sri Satok, PDK Sentuhan Kasih enggau PDK Petra Jaya.

“Perintah meri geran tambah tu dikena ngelempungka tating belanja palan nya ti balat tejanggal ketegal pengerekai penyakit Covid-19,” ku iya.

Iya bejaku munyi nya ba Program Nyerahka Geran Ngagai PDK, PAWE, PPWE enggau NGO Bagi Pelilih Kuching di PDK Sri Satok ditu, kemari.

Fatimah madahka, penyakit Covid-19 udah meri pangka besai ngagai penatai pemisi, pekara pelajar, pengawa ekonomi sereta mental rayat menua.

“Opis menteri kami endang bendar ngemeratka pekara raban ti diselinting baka orang tuai, nembiak mit ti dijaga apai tauka indai tunggal, raban orang nyelai pendiau (OKU), pesakit raya enggau raban kampar.

“Geran tambah tu dikearap ulih mantu palan PDK, PAWE enggau PPWE bejalaika pengawa sida, tang aku ngarapka kitai sama nyaga pengerai diri kelebih agi palan di Zon Mirah tauka Pelilih Kuching.

“Ungkup PDK, PAWE enggau PPWE ti ba zon gadung, sida tau bejalaika aktiviti berengkah diatu tang mesti nitihka Atur Pengawa Standard (SOP) ke udah ditetapka,” ku iya.

Iya madahka, pengawa nyeliahka diri ari dirampit Covid-19 patut nyadi pekara besai laban raban ti suah dirampit Covid-19 iya nya orang tuai, pesakit darah tinggi enggau pesakit diabetis.

“Guna geran tu enggau manah, enti ulih anang ngatur program ba palan mensia mayuh ngambika kitai sama ulih besaup ngurangka risiko kena rampit Covid-19.

“Aku meransang pengatur palan PDK, PAWE enggau PPWE ngambika chakah agi ngatur program sida nengah tali arus,” ku iya.

Sama bisi datai Pemangku Direktor Opis Pengintu Pengelantang Mensia Mayuh (JKM) Mohamad Guntor Rajee, Chairperson PDK Sri Satok Datuk Dr Munirah Hassan enggau bala bukai.