SELANGAU: Perintah Sarawak keran mantu rayat nengah Projek Nyeleti Rumah Miskin Sarawak (PPRMS), pia ku Adun Tamin Ir Christopher Gira Sambang.

Ku iya, Perintah Sarawak diiring Gempung Parti Sarawak (GPS) mega deka meda rayat diau ba rumah ti likun agi enggau ngasaika pengelantang ari projek nya.

“Projek PPRMS tu ulih ngelempungka tating penusah rayat kelebih agi sida ti datai ari ruang bilik ti tusah.

“Nengah projek tu, peranak rumah panjai ulih ngaga rumah tu chara beripai enggau pangan diri kelimpah chara baka tu ulih ngelimat ungkus dikena ngentak rumah,” terang Gira.

Apin lama ke udah, iya madahka bisi lima buah rumah panjai ba sitak Dun Tamin nerima kereban berumah nengah Projek PPRMS dikena nyeleti rumah panjai sida.

“Sekali tu, Rumah Juli ke bisi 12 pintu ba Kemena, Balingian enggau Rumah Banyoi ke bisi 14 pintu ba Sungai Pelugau, Balingian bela nerima bantu atap rumah.

“Nambahka nya, Rumah Jungan (sepintu) udah nerima bantu dik rumah seraya Rumah Merom Jelani, Ulu Mukah (21 pintu) enggau Rumah Ramping Mugang (28 pintu) ba Ulu Mukah mega bela nerima bantu atap rumah,” terang Gira baru.

Berebak enggau nya, Gira ngelalau rumah panjai ti udah disediaka kereban berumah nengah PPRMS nya deka berengkah nyeleti rumah sida.

“Pengawa tu beguna amat laban agih belanja PPRMS ke bukai deka diagih pengudah pengawa nyeleti nya tembu dipejalai,” ku Gira.

Nya alai ku Gira, rumah panjai ti udah minta PPRMS tang apin nerima kereban berumah tu dikearap besabar nganti.
“Aku ngarapka sida ti udah minta tang apin nerima kereban berumah tu ulih besabar.

“Enti agih belanja nya udah bisi, aku deka nyuaka kereban berumah nya ngagai kita,” ku iya.

Projek PPRMS nya inisiatif Perintah Sarawak ngambi nampung pengawa mantu rayat miskin ba Sarawak pengudah Perintah Pakatan Harapan (PH) ked ulu udah ngetuka semua inisiatif nya.

Projek tu mega nentuka sida ke patut nerima bantu deka ngembuan rumah ke likun endur diau.

Nangkanka nya, Gira udah nyuaka kereban berumah Projek PPRMS ngagai bala penerima seraya dikemata Pemesai Pelilih Selangau, Inting Nyami sereta pengari ari Palan Servis Dun Tamin.