KUCHING: Kaban Kunsil Nengeri (Adun) Marudi Datuk Dr Penguang Manggil terus ransing matau pemansang projek ti udah, benung enggau deka dipejalai di sitak iya.

Iya nyebut pekara nya ba Program Ketuai Begulai Rayat enggau Program Makai Selamat Nyiri Ketuai Raban Bansa Dennis Tija sereta Nampung Timpuh Penghulu Patrick Jelaman di Kampung Long Jegan B, Tinjar apin lama.

Nengah akaun media rama (Facebook), iya madahka entara projek ti udah tembu ba sitak nya jalai alun belakin tama ke Long Jegan, nyeruri jalai nuju Long Jegan A, nyeruri jalai ba mua Long Jegan B, projek nyeruri rumah, nyendiaka taba rumah panjai KK Henry Kassim Wen enggau projek mit bukai.

Kelimpah ari nya, Penguang madahka projek ke benung dipejalai diatu iya nya Projek Rayat nyambung Bekal Kuasa Karan Menua Pesisir ‘Res Phase-1’ ti deka meri pemaik ngagai peranak di Long Toyut, Long Tabing, Long Teran, Long Jegan, Long Takong enggau Long Tisam.

Nangkan nya, ungkup projek ti deka dipejalai ba sitak nya iya madahka projek tu nyengkaum nyeruri jalai alun ari simpang Lapok nyentukka ke Long Tisam ba baruh pakej HDA.

“Bisi mega projek bukai ba baruh Projek RTP2020 iya nya ngaga begunan Gerija RC Long Jegan ke alai agih belanja ngaga begunan gerija tu dikunsi kami duai Kaban Parlimen Baram Anyi Ngau penyampau RM400,000 enggau ngaga Balai Sekula SK Long Jegan ba baruh RTP 2021 beungkus RM250,000,” ku iya.

Iya nandu, seraya nganti projek nyeruri jalai alun HDA dipejalai, iya deka bekerejasama enggau JKR ngambika sekeda palan ti kelalu balat jai iya nya ba simpang Long Tabing enggau Long Teran diseruri dulu enggau lengkas.

“Aku meri agih belanja MRP RM15,000 ngagai JKKK Long Jegan A, RM5,000 ngagai Biro Orang Indu Long Jegan A, RM15,000 ngagai JKKK Long Jegan B enggau RM5,000 ngagai Biro Orang Indu Long Jegan B sereta RM5,000 ngagai Biro Orang Indu Long Jegan C.

“Sebedau tu, aku bisi nyerahka agih belanja MRP RM5,000 ngagai Gerempung Buhup Nyanyi Dahin Dahun Tuhan ti diarika KK Lah Anyie Ngau,” ku iya.

Sama bisi datai Cr Edward Mendai Chaiman MD Marudi enggau SAO Marliney ti ngarika Pemesai Pelilih Menua Beluru.