SONG: Raban Nembiak Parti Pesaka Bumiputera Bersatu (PBB) Pampang Katibas udah ngatur randau begulai enggau Opis Kereja Raya (JKR) Song sereta pengempu tanah ba sepanjai jalai alun ngagai Engkabau ba Palan Servis iya, Hari Minggu tu tadi.

Program randau nya betuaika Ketuai Nembiak PBB Pampang Katibas Zully Ambrose Blikau ngarika Adun Katibas Dato Sri Ambrose Blikau Enturan begulai enggau JKR Song sereta pengempu tanah.

Lebuh bejaku, Zully meri terima kasih ngagai semua pengempu tanah laban udah setuju enggau perambu nyeleti jalai alun ngagai Engkabau.

Ku iya, jalai nya deka diseleti nengah agih belanja Dun Katibas.

Zully madahka sebedau tu jalai alun nya udah tembu dipejalaika JKR ti beungkus RM30,000 tang diatu jalai penyambung nya diatu balat rusak.

“Pengudah ngatur randau begulai enggau JKR sereta pengempu tanah nya, sida setujuka perambu ngemanah jalai alun ngagai Engkabau deka dipejalai baru seraya nganti JKR Sarawak ngaga pelin jalai enggau tender,” ku Zully.

“Pengawa nyeleti jalai tu beguna amat ungkup pengelantang rayat kelebih agi ba Engkabau tu.

“Terima kasih ngagai Blikau, Sapit Residen Kapit Galong Luang, JKR Song enggau Mandred laban mujur nyeleti jalai tu enggau lengkas,” terang Zully.