SARATOK: Siku nembiak peranak Rumah Julius Enggan, Wong Nansang di Awik, ditu sebana pedis belajar chara online laban menua ti nadai arus internet.

Penanggul ke sebaka dibantaika Aisyah Zaidi, 23 taun siku nembiak ke benung belajar ba sebuah palan pelajar tinggi swasta (IPTS) di Kuching.

Kenu ku Aisyah arus internet ke langsung nadai nya ngenusah iya sereta nembiak sida serumah ke bukai nerima kereja sekula ke dianjung bala pengajar.

“Ninting Hari Satu sigi tumu aku nurun ke pasar Saratok, ukai deka meli barang tang laban deka ngulihka arus internet,” ku iya ti benung ngambi pelajar TESL di Universiti Tun Abdul Razak (Unitar).

Tandu Aisyah penanggul nya ukai semina ditapi sida ba rumah panjai Wong Nansang aja tang mega rumah panjai bukai ke besemak.

“Kebendar tiang pemanchar udah bisi didirika semak tu, tang enda nemu nama kebuah piring pemanchar internet lalu apin dipasang nyentuk ke sehari tu,” ku iya mantaika sebana ngagai Suara Sarawak.

Berebak enggau nya, ngarapka bisi piak merening penusah lalu mutar penanggul ke ditapi sida di menua nya.

Ungkup penemu rumah panjai Wong Nansang tu semina urung 20 minit pennyauh ari Pasar Saratok.

AISYAH ZAIDI