SIBU: Menteri Muda Kaunsil Kandang Menua enggau Pengawa Berumah, Dr Annuar Rapaee dekaka Rumah Bungkong Amoi, Batu 19, Jalai Oya ditu diintu nyadi rumah panjai pesaka ba Dun Nangka.

Iya ti mega Adun Nangka madahka rumah panjai nya sebuah rumah panjai ti nyelai ba sitak iya.

“Rumah Bungkong nya entara sebuah rumah panjai ti ngembuan penyelai dalam sitak Dun Nangka.

“Kitai mesti ngetanka gaya rumah panjai nya ngambi dipandang ngagai orang luar kelebih agi bekaul aktiviti dagang temuai.

“Taja pia, aku udah mantu nyeleti rumah panjai tu ngena agih belanja Program Transfomasyen Menua Pesisir (RTP) ngambi rumah panjai tu diseleti tang agi ngetanka pengelain dalam rumah panjai nya,” ku iya lebuh dirandau tang nadai madahka ungkus projek nya.

MESTI DISELETI… Dr Annuar (kanan) berandau enggau Bungkong lebuh ngabas rumah panjai nya, apin lama ke udah.

Menteri Muda Pelajar, Sains enggau Pansik Teknologi nya madahka sida deka nyeleti tanju rumah panjai nya.

Terang iya, sida deka ngena kayu tebelian ngambi ngetanka gaya kayu lama ti udah dikena sebedau tu kelebih agi ba ruai enggau tanju.

“Nya kebuah, tanju nya sebagi ari penyelai rumah panjai lalu kami nyeleti tanju nya ketegal udah repuk enggau tau ngeruga pengelikun bala bukai.

“Tanju rumah panjai tu benung diseleti,” terang Dr Annuar.

Iya mega dekaka rumah panjai nya nyadi rumah panjai pesaka ba sitak iya ngambi ngetanka adat enggau pengelain dikembuan dalam rumah panjai nya.

“Diatu, tebal agi rumah panjai udah digaga nunda gaya moden lalu mayuh ngaga rumah panjai batu sereta jarang bisi digaga tanju.

“Papan iya mega ngena music sereta udah berubah nunda gaua moden.

“Kebuah pia laban kereban berumah baka kayu mar rega enti dibanding ungkus ngaga rumah batu.

“Rumah Bungkong nya rumah panjai asal ti beumur manggai empat ngagai lima puluh taun.

“Nya alai, kitai mesti ngetanka penyelai dalam rumah panjai nya laban diatu jarahng kitai ulih meda rumah panjai asal baka tu ketegal segang pemansang,” ku Dr Annuar nyemetak madah.
Nambahka nya ku iya, rumah panjai tu udah disikap ngena perengkaguna pemun enggau infrastruktur sereta ulih dilawa bala pengusung nengah jalai darat.
-abis-

Slug rumah warisan p1
MESTI DISELETI… Dr Annuar (kanan) berandau enggau Bungkong lebuh ngabas rumah panjai nya, apin lama ke udah.

Slug rumah warisan p4 (Cover)
PALAN PEMATAK BARU… Gaya Rumah Bungkong dipeda ari luar bepau nyadi rumah panjai pesaka ba sitak Dun Nangka sereta diangkat nyadi palan pematak baru.