KUCHING: Sarawak andal ulih nyadi sebagi ari pengeksport kuasa hidrogen dunya laban kuasa tu majak ngerembai nitihka segang pemansang dunya.

Kepala Menteri Datuk Patinggi Abang Johari Tun Openg madahka lebuh Aum Kedua Renggat Kelima Dun Ke-18 apin lama iya ditanya pasal baka ni pengerembai industri hidrogen tu ba jeman ti deka datai.

“Maya nya aku nyaut nitihka pansik European Hydrogen Union makit kuasa hidrogen ba taun 2030 ngagai 2050 manggai $11 trillion (11 trillion dollar).

“Nitihka pansik nya, menua Australia deka nyadi menua pengeluar hidrogen pemadu besai, nya kebuah aku berunding menua kitai nyangka ulih ngambi bagi,” ku iya.

Abang Johari bejaku munyi nya ba randau webinar begulai enggau Gerempung Besai Orang Dagang Sarawak ditu, pagi tadi.
Ku iya, guna kuasa hidrogen mega ulih nagang asap karbon dioksida ke nyadi pengeruga besai ngagai pengamah angin menua.

“Pekara tu mesti dijaga perintah, nya alai kami ngiga kuasa ti ulih nganti minyak ti ngeluarka asap karbon dioksida nengah kuasa ti ulih dikemaru.

“Hidrogen ukai semina ulih nyadi minyak, tang mega ulih meri kuasa karan laban Sarawak ngembuan penyampau ai ti chukup mayuh.

“Tegal nya, kami sebuat ngaga pansik ngagai menua Jerman, Itali enggau Korea deka nemu kuasa hidrogen tu ngeruga pengelikun tauka enda,” ku iya.