LIMBANG: Agih belanja ungkup Opis Menteri Betanam Betupi Moden, Tanah Adat enggau Pemansang Kandang Menua Sarawak (Manred) nambah 37 peratus dibanding taun nyin kemari.

Menteri Muda iya, Datuk Dr Abdul Rahman Ismail madahka agih belanja ti ditambah nya mandangka Perintah Sarawak keran dekaka Sarawak nyadi palan tibang pemakai manggai taun 2030.

Iya mega nerima manah agih belanja baka ti dibantaika Kepala Menteri Datuk Patinggi Abang Johari ba Aum Dun tu tadi.

Abdul Rahman mansutka jaku nya lebuh ngabas Taba Projek enggau Bantu Opis Betanam Betupi Bagi Menua Limbang di Kampung Limpaki, apin lama ke udah.

Abdul Rahman ti mega Adun Bukit Kota madahka projek pemansang ba Kampung Limpaki lanchar dipejalai.

Ku iya, genturung pendiau tu udah nerima agih belanja penyampau RM150,000 dikena nyeleti jalai kebun pemanjai sekilometer enggau numbuhka Projek Taman Agro.