SARATOK: RM20,000 udah diagih ngagai Gerempung Bansa Dayak Sarawak (SDNU) Saratok dikena ngatur aktiviti enggau ngangkatka main asal.

Sapit Menteri Pengeluar Kuasa enggau Pengeraja Asal, Ali Biju madahka sebarang pengawa ngaul main asal endang patut disukung.

Ku iya, pekara tu beguna amat nentuka main asal lebih agi ti dikembuan raban bansa Dayak enda punas ngapa diseruyut segang pemansang dunya kemaya hari.

“Ambika chunto, baka Ajat Iban enggau Kuntau ti nyadi sebagi ari kelai tauka identiti mida raban bansa Dayak Iban enggau etnik Dayak ke bukai.

“Kededua main asal tu ukai semina tau ngangkatka nama bansa asal majoriti nguan Pulau Borneo tang mega mai kitai temegah ati ngembuan tanda enggau seni ngetanka diri ti nyelai,” ku iya.

Jaku Ali nya disebut Pengajar Walter Changgai Geramong lebuh ngarika iya nyuaka chek Projek Mit Pemansang Menua Pesisir (MRP) ngagai SDNU Saratok di Rumah SDNU ditu, apin lama ke udah.

Chek nya diterima Presiden SDNU Saratok, Jeti Kumpai Datuk Amar Dunstan Enndawi seraya dikemataka Pengajar Alexander Sela, John Jelema enggau kaban exco gerempung ke bukai.

Berita penuh Ruai 6 pagila.