KUCHING: Urung 250 iku pesakit tungkul sengayuh diripotka bebadi nyawa ba Sarawak ninting taun.

Menteri Kaunsil Kandang Menua enggau Pengawa Berumah Datuk Sri Prof Sim Kui Hian madahka penyedar sentang nyaga pengerai di menua tu amat beguna dikena nyeliahka mayuh bengkah penyakit nyengkaum sakit tungkul sengayuh.

“Ninting taun Sarawak ngerikodka urung 500 ngagai 550 iku pesakit tungkul sengayuh ti baru.

“Ari penyampau nya, 250 ari sida mati ke alai 300 iku pesakit tungkul sengayuh di menua tu nambah ninting taun,” ku iya.
Kui Hian bejaku munyi nya ba Program Nyerahka Bantu Mesin Hemodialisis Ngagai NKF Kota Samarahan di NKF Pampang Kuching ditu, ngalih hari tadi.

Ku iya mega, penyampau pesakit ti berubat ngena mesin hemodialisis diatu bisi 3,544 iku.

“Ari penyampau nya 90 peratus (3,192 iku) berubat ngena mesin hemodialisis lalu 10 peratus ke bukai berubat kediri,” ku iya.

Iya madahka, ba Malaysia bisi 44,136 iku pesakit tungkul sengayuh dirikodka benung berubat.

“Opis Menteri Pengerai bisi nyendiaka 25 buah palan berubat hemodialisis ti dicaj RM13 sekali berubat di Sarawak.

“Kelimpah ari nya, sepital peribit bisi 12 buah palan berubat hemodialisis iya nya lapan buah di Kuching, dua buah di Miri, sebuah di Sibu enggau sebuah di Bintulu.

“Sekali berubat pesakit deka dichas RM200 ngagai RM300,” ku iya.

Tandu Kui Hian, gerempung ukai dikuasa perintah (NGO) mega bisi nyendiaka palan berubat hemodialisis iya nya lima buah palan di Kuching, sebuah di Miri, dua buah di Sibu, sebuah di Bintulu enggau sebuah di Serian.

“Ungkus berubat hemodialisis ba palan NGO tu entara RM90 ngagai RM150 sekali berubat,” ku iya.