LUBOK ANTU: Penanggul nengah jalai alun ke lichin nyerumba musin pengujan sereta tau bendar ngeruga pengelikun enda ngelemika ayu bala pengajar Sekula Primari (SK) Nanga Menjuau sereta staf sukung, ditu ngemujurka Program Outreach Home Based Learning (HBL).

Penulung Kanan SK Nanga Menjuau, Pengajar Jesse Nicholas Nyanggai madah, diatu ai sungai suah bah ketegal musin landas nya alai enda berapa likun endur sida berundang ninting hari ngujungka piak sekula nyendiaka kutak khas endur engkah kereja sekula bala nembiak kelimpah bala pengajar empu datai ngelawa rumah panjai ninting Hari Tiga.

“Kami bisi ngasuh bala apai indai nembiak nganjung enggau ngambi kereja sekula bala anak sida tiap dua hari sekali.

“Penanggul nadai bungkur arus internet ke menyana ukai pekara baru, tambah agi penanggul nembiak ditu ke bedau ulih bebelika gajet telefon pintar dikena besambung enggau bala pengajar. Semua pemar tu tetap ditapi enggau liat ati lebih agi ngajar di menua ulu.

“Program HBL dikemujur ninting Hari Tiga lalu bala pengajar kami bisi dibagi ngagai empat buah tim. Tim 1, 2 enggau 3 deka ngelawa nembiak sekula kami ba rumah panjai lalu meri kereja rumah, ngajar sereta ngiring sida. Pengawa tu dipejalai kira lebih setengah hari ba tiap-tiap rumah panjai.

RANSING…Bala nembiak benung nembuka kereja sekula di ruai sebuah rumah panjai seraya dikemataka bala pengajar enggau apai indai nembiak. Foto : Facebook SK Nanga Menjuau

“Udah nya Tim 4 iya nya bala pengajar indu ke bisi beranak mit sida diasuh diau ba sekula nerima tauka ngajar bala nembiak ti semak enggau sekula.

“Bala nembiak ke ti semak sekula sigi diasuh nurun ke sekula belajar setengah hari sereta bisi disediaka makai tengahari,” ku iya nerang ngagai Suara Sarawak bekaul enggau atur HBL di sekula nya sekumbang semua sekula ba selampur menua diasuh piak Opis Menteri Pelajar (KPM) tutup ketegal pengerekai penyakit Covid-19.

Nangkan ke nya, pengajar Jesse ke udah manggai tujuh taun ngajar ba SK Nanga Menjuau pengawa bala pengajar ke ngelawa rumah panjai bisi disempulang tujuh iku Raban Staf Sukung (AKP) sekula tu.

Nerang silik, Jesse madah entara rumah panjai ke bisi dilawa sida iya nya Rh Upok Lepong Kepayang. Pejalai kitu kira setengah jam mudik ngulu Sungai Skrang.

Udah nya pejalai ke Rh Lidom, Sungai Paya urung sejam enti ngena entukar 4WD (4X4) nengah jalai ke lichin sereta niki enggau nurun Bukit Kemantan ke chukup renjan nyau asaika digenggam semengat.

BEBATAK…Bala pengajar ngelawa rumah panjai ngena perau, kekadang bebatak, besuar lebuh datai ba sungai ke pabu. Foto : Facebook SK Nanga Menjuau

Kepenudi iya nya ngelawa Rh Ambu di Emperan kami ngena perau kira setengah jam pejalai ngili Sungai Skrang, ku iya.

Dua buah agi rumah panjai ke ke enda ulih dilawa raban pengajar iya nya Kampung Begantung enggau Kampung Panchor laban ti kelalu jauh niki bukit sereta enda ulih pulai hari.

Rumah panjai ke semak sekula tu iya nya Rh Robert, Nanga Menjuau lalu bala nembiak ke ditu diau ba langkau arau digaga semak sekula.

Ngelansa randau bukai, pengajar Jesse ngarika rayat mayuh ba menua nya minta piak bekaul lengkas nirika tiang pemanchar dikena mutarka penanggul nadai arus penyambung ba menua nya sereta ke pemaik bala pengajar enggau nembiak sekula.

“Jam diatu kami sekula ngena sistem ‘ConectmeNow Prepaid’ ti nguna ungkus tambah nilai internet ke chukup mar,” ku iya.

ENGKAH DITU…Kutak khas disedia SK Nanga Menjuau endur bala apai indai ngambi enggau ngengkah kereja sekula bala anak sida.

Ungkup penemu SK Nanga Menjuau kebendar siti sekula ke pemadu jauh dibaruh Opis Pelajar Pelilih (PPD) Lubok Antu ditumbuh ba taun 1962.

Pejalai ngelawa sekula tu enti ngena jalai darat tauka jalai batang kira enam ngagai tujuh jam. Tang enti jalai lichau bala pengajar suah bemalam ba rantau jalai.

Nyema ngena perau ngambi awak dalam empat ngagai tujuh jam bekejang ari Pengkalan Kampung Murat.

Kenyau 58 taun ke udah, bisi 16 iku kepala pengajar udah betukar ngiring sekula tu. Kelia, sekula tu didiri ba atas bukit digaga bala apai indai nembiak enggau komuniti besemak ngena chara beripai.

Taun 2000, berita ke chukup sinu lebuh sekula tu dituntung penusah bah besai ngujungka sekeda begunan sekula ke baru tembu digaga nyengkaum sebuah librari anyut rarat ditabanka ai bah.

SEDIA BELAJAR…Bala nembiak SK Nanga Menjuau benung berintai manah ba ruai nganti bala pengajar meri kereja sekula.

Bekau ari penusah nya, sekeda begunan sekula didirika baru lalu diatu bisi begunan opis ke baru, buding baru, dua buah blok kelas enggau lima rumah staf, bilik mandi enggau ke bukai.

Taun tu (2020) bisi 42 iku semua nembiak belajar ba sekula tu iya nya pra sekula enam iku lalu primari satu ngagai enam bisi 36 iku. Ari penyampau nya 36 iku bemalam ba buding lalu 6 iku berundang ari rumah ninting hari.

Kepala Pengajar sekula tu diatu, pengajar Singka Edang lalu iya dibantu Jesse, Usin Kanyong (PK Hem), Raynold Tay Liang Yu (PK KK) ba renggat atas ngatur sekula.

Udah nya, semilan iku agi pengajar ditu iya nya Joanne Damie Mancha, Muhd. Shaipul Adli Hussin, Muhd Ariff Aripin, Abg Muhd Fahtur Abg Madehi, Natasha Ideris, Noor Amirah Muhd Khairan, Husna Nabilah Abdullah enggau Christy Dau.