KUCHING: Aku berasai gaga laban nemu diri purih anak seni ari Luli Gagat iya nya indu Iban keterubah belakun ba filem entarabansa, ku Nesfamita Anthony.

Nesfamita, 33 taun uchu ti sebilik enggau Luli diatu madahka suba lebuh Luli nyerita diri kala nyadi pelakun sida baka ti enda arap.

“Kekadang kami baka ke enda pechaya enggau cherita iya madahka diri kala belakun, ngagai Singapura, betemu enggau bini Rajah, betemu enggau Agong sereta cherita bukai.

“Diatu aku berasai temegah laban ini aku dikelala nyadi indu Iban keterubah belakun ba layar entarabansa,” ku iya lebuh ditanya pemberita ditu, sehari tu.

Ku Nesfamita, sida suah nanya Luli pasal pengidup orang kelia maya iya agi dara.

“Ini suah nusi maya belakun sida dijaga raban Rajah kelebih agi iya empu laban iya indu.

“Enda nyangka purih kami endang bisi darah seni ari ini kami empu,” ku iya.

Taja pia, Nesfamita madahka iya bisi berasai mimit asa ketegal peturun sida enda neruska pejalai pengidup nyadi siku pelakun baka ini iya Luli.

“Laban iya enda dikelala orang mayuh engka nya nyadi kebuah kami nadai nitihka iya nyadi pelakun.

“Semina siku aja petungal kami ti bisi nitihka pejalai seni baka ini kami tang iya semina belakun ba tikas teater aja,” ku iya.

Luli siku indu Iban ari Kapit kala belakun ba filem ‘The Long House’ nengah sebuah produksyen entarabansa bepalan di Singapura.

Filem tu keterubah iya ditayangka ba Singapura ba taun 1954 lalu Luli nyadi indu Iban keterubah belakun ba layar entarabansa maya nya. -INDUN SILONG