KUCHING: Nyadi indu Iban keterubah belakun enggau serikat entarabansa siti ari pekara ti amat dikemegah Luli Gagat pelakun indu dalam filem ‘The Long House’.

Indu asal ari Kapit tu madahka, maya diambi belakun kelia umur iya baru manggai 17 taun.

“Maya aku agi mit, apai enggau indai aku midang, ngujungka aku enda besekula.

“Lebuh belakun aku berasai takut laban enda nemu bejaku enggau lelaki orang putih, aku enda nemu jaku sida, sida pan enda nemu jaku aku,” ku Luli lebuh ditanya pemberita ditu, kemari.

Luli diatu beumur 85 taun bisi tiga iku diri menyadi, lima iku anak, 15 iku uchu enggau 10 iku ichit.

Entara gambar dalam filem ‘The Long House’ ti ditayang ba Singapore taun 1954.

Ku Luli, sida belakun ba Rumah Panjai Sungai Amang, Kapit sepengelama dua bulan.

“Filem tu pasal siku lelaki orang putih ti labuh pengerindu ngagai siku indu Iban ba rumah panjai.

“Tang pengerindu seduai ditagang orang kampung ti ngujungka orang rumah panjai ngaga pemutus deka munuh lelaki nya.

“Pengujung iya, lelaki nya mati ditunu ba rumah panjai tang indu Iban nya selamat,” ku iya ngenang filem ke digaga taun 1954 nya.

Tandu Luli, diatu Rumah Panjai Sungai Amang udah nadai agi tang kenang iya belakun dia semampai dikeingatka.

Ku iya, pengudah filem nya tembu, Luli enggau aya iya dibai serikat rikoding raun ke Singapura laban ba dedin mih filem tu berengkah ditayang.

“Aku chukup gaga laban filem tu keterubah ditayang ba Singapura.

“Taja pia, aku berasai malu laban dalam filem nya aku nadai bebaju,” ku iya.

Luli madahka ketegal belakun nadai bebaju dalam filem nya, bini Rajah Charles Brooke iya nya Margaret Brooke datai ngagai Singapura enda ngasuh iya belakun nadai bebaju agi.

“Margaret madah ngagai aku, enti orang bisi ngasuh nuan belakun nadai bebaju agi nuan patut madah ngagai aku.

“Ari nya, Margaret ngajar aku ngena baju, ngena kasut enggau pekayan ti meruan laban maya nya aku ngena selipar jipun,” ku iya.

Dulu ari nya, Kaban Gerempung Pemansang Filem Nasional Malaysia (Finas) Sarawak Datuk Norhyati Ismail madahka kisah pengidup Luli patut digaga nyadi sebuah cherita laban iya nyadi indu Iban keterubah belakun ba filem entarabansa.