MUKAH: Mensia mayuh dikearap ulih guna program AgriCOP dikena nambahka penemu enggau asil betanam betupi sida.

Menteri Muda Ba Opis Kepala Menteri, (Undang-Undang Enggau Adat Bumiputera) Datuk John Sikie Tayai madah, nengah penemu ke dikembuan ba pengawa betanam betupi moden dia rayat deka ulih mantu nyungkak penatai pemisi nengeri tu.

“Tu engkeman amat awakka maya manggai taun 2030 ila, raban orang bumai bela ngembuan penatai pemisi ke besai.

“Tambah mega tu endang juluk perintah perintah nengeri ti deka meda rayat nguna pemansang teknologi dalam bejalaika pengawa betanam betupi seriris enggau nengeri maju,”ku iya.

Sikie ke mega Adun Kakus mansutka jaku tu rambau Program Ketuai Begulai Enggau Rayat ba Rumah Kilan Puak, Begerik ditu kena Hari Lima (27 November) tu tadi.

Nangkan ke nya, Sikie bisi nyebar mensia mayuh ke beumur 60 taun enggau ke atas lengkas minta Skim Kad Emas Kenyalang ke pemaik sida dudi hari.

Udah nya, iya bisi nyuaka chek projek mit menua pesisir (MRP) ngagai lima buah Komiti Enggau Pengelikun Genturung Pendiau (JKK) penyampau rm72,000.

Bela bisi disuaka rambau tu setipikit tuai rumah ngagai lima iku tuai rumah ba sitak nya sereta setipikit ngagai 27 buah JKKK rumah panjai ba sitak Bawan.

Nambahka nya iya mega bisi ngagihka belanja RM20,000 ngagai JKKK Rumah Kilan, Puak lalu Senator Rita Sarimah Insol meri agih belanja RM5,000 ngagai Biro Indu Rumah Kilan.