KUCHING: Kes insiden meletup dalam begunan Cityone ti ngujungka tiga iku orang bebadi ba taun 2018 siti kenang ti enda ulih dibuai, ku Penny Johnny Nauh.

Penny siku indu ke gawa ba sebuah Opis Bomba enggau Penyah Penusah Malaysia (JBPM) Sarawak di Jalai Setia Raja ditu madah sekumbang 11 taun udah gawa bomba nya keterubah iya meda kes begunan meletup ba mata iya empu.

“Baka ti meda filem beperang, baka nya meh utai ti dipeda aku lebuh tama dalam begunan nya.

“Terubah tama aku ninga nyawa mensia rerauh minta tulung, bau rum enggau beabus tang maya nya aku enda ulih meda enggau nyata laban kelalu petang,” ku iya bejaku lebuh ditanya pemberita ba Program Meri Tanda Basa Bomba Indu di JBPM Jalai Setia Raja apin lama.

Indu ke beumur 32 taun nya madahka lebuh nerima kangau sida sebuat terus berumba ngesah palan penusah.

NUSUI BARU…Penny nusui peneleba iya maya insiden begunan dalam Cityone meletup taun 2018.

“Kami nyadi raban penyelamat keterubah datai dia sebedau raban ari opis pengerai.

“Bisi sekeda sida ke tasah madah munyi tu ‘tulung bini aku dalam nya!’, tang agi aku ingat nyentukka diatu aku tepedaka siku lelaki bediri dedegi enda engkebut.

“Tubuh iya retung iya nya kira-kira 80 peratus udah angus lalu iya semina ngena tanchut ti charik aja,” ku iya.

Ku iya, lelaki nya trauma baka ti enda nyangka pekara baka nya ulih nyadi di mengeri.

Tandu Penny, nyadi siku indu ti gawa nyadi bomba iya endang udah ngadang kes penusah ti berat baka nya deka nyadi.

“Aku udah besedia lalu sama enggau raban bomba ke lelaki mantu orang ke tasah.

“Mayuh agi kes bukai dipeda aku baka kerita belantak enggau treler, motosikal dipirit traler enggau ke bukai.

“Aku mega udah suah ninga nyawa orang rerauh madahka diri pedis lebuh diangkatka kami,” ku iya.

Iya mega madahka diri tekadang bisi ngembuan ati tekenyit meda pendiau sida ti patah tulang punggung, belipat kaki, putus lengan, putus kaki enggau ke bukai.

“Aku berasai sinu meda penusah ti nyadi nya tang lebuh mujur nyelamatka orang ti dituntung penusah ati aku berasai puas.

“Aku ngarapka, orang luar enda ngemaruhka indu ti gawa bomba laban kami sigi dilatih bejalaika pengawa enggau manah.

“Nama pengawa ti digaga orang lelaki dalam bidang tu kami indu mega ngaga,” ku iya.

Sarawak bisi ngembua 1,194 iku raban bomba ke alai 65 iku tauka 6.1 peratus ari sida nya indu.

INDU BOMBA…Raban indu bomba di JBPM Sarawak.