LEBUH nyebut pasal pulau, udah tentu runding kitai deka tekuing pasal pemanah pulau nya kelimpah suah endur ngelantangka ati.
Lebuh kemisi, udah tentu kitai deka milih endur ke manah ngelantangka ati, tang anang salah pilih.

Tang bebida amat enggau pulau ke deka dirintai di baruh nya ungkup penemu kita.

Ngelama tu nyangka kitai ngumbai pulau nya manah aja tang bebida enggau sekeda pulau ke bisi ba serata dunya.
Pulau tu chukup nyelai kelimpah ngundan sejarah dataika iya dikenang belama.

Pulau Anak Patung di Mexico

‘Isla de las Munecas’ tauka dikumbai Pulau Anak Patung di Xochimilco nya pulau ti ngundan 1001 leman sejarah ke tau ngasuh takut. Pulau tu penyauh 17 kilometer ari Mexico City.

Taja pulau tu ngundan seribu sejarah tang bala temuai enda masau peluang diri ngelawa pulau anak patung tu. Beribu anak patung digitang ba pun enggau dan kayu ngelingi pulau nya.

Bisi sekeda anak patung nya nyau putus jari, putus kaki enggau nadai pala. Nitihka cherita, pulau nya berantu laban bisi siku anak mit indu parai lemas.

Beduduk ari nya, siku lelaki benama Don Julian Santana Barrera udah tetemuka anak patung melepung ba tisi pulau enda jauh ari bangkai anak mit nya.

Kenyau ari nya, Barrera suah ninga munyi anak mit nyerauh enggau nyabak. Ketegal enda tan ati ninga munyi nya, iya ngaga pemutus ngitang anak patung nya ba dan kayu kelai bebasaka semengat anak mit nya.


Pulau Hashima di Jipun

Nitihka sejarah, pulau Hashima tu kala endur orang ngiga arang batu enggau nyadi palan pengentap sida ke ngali kelia. Tang, enda mukai-mukai mayuh orang parai ba pulau nya pengudah industri minyak diempu menua Jipun. Diatu, nadai orang nguan pulau nya ngujungka nya nyadi pulau berantu.

Pulau Poveglia di Itali

Sebuah pulau ba menua Itali ke enda tau dilawa mensia mayuh tu kala nyadi zon kuarantin lebuh jeman Black Death. Lebuh nya, beribu orang ke sakit maya jeman Black Death udah ditunu ba pulau tu. Kelimpah ari nya, pulau tu nadai orang nguan enggau ditutup kenyau ari taun 1968.


Pulau Ramree di Vietnam

Pulau Ramlee ba Teluk Bengal tu ngundan sejarah lebuh Jeman Perang Dunya Kedua. Nitihka sejarah, bisi 500 iku soldadu Jipun ditagup baya ba pulau tu. Pia mega, nyentuk diatu agi mayuh baya nguan pulau nya.


Pulau Tromelin di India

Ba taun 1761, kapal serikat East India udah nganjung 142 kru enggau 160 kuli ngagai pulau nya. Nitihka penerang, 200 iku sida mujur datai ba Pulau Tromelin tu tang enda ulih pansut. Lebuh nya, semina lapan iku aja ti ulih mulaika diri ari pulau nya. Pekara ke tau ngasuh alit ati nya, lapan iku sida ti selamat dibai sebuah kapal Perancis pengudah 15 taun nadai ditemu.


Pulau Krismas di Australia

Ninting taun, bejuta ketam mirah ayan niki ke pantai ba pulau nya laban deka betelu. Nya alai, bejuta ketam nya tadi deka ngemenuhka pulau nya kelimpah nyau baka pasir enti ditimpai ari jauh.