Bajet 2021: Insentif ungkup sektor dagang temuai patut dikemerat

KUCHING: Perintah Besai patut ngemeratka insentif enggau bantu ngagai sektor dagang temuai menua ti balat kena empas ketegal pengerekai Covid-19 ba Bajet 2021.

Menteri Nembiak enggau Lumba ti mega Menteri Dagang Temuai, Seni, Main Asal Datuk Abdul Karim Rahman Hamzah madahka sektor dagang temuai menua maya tu amat mar deka dikerembai ngagai menua luar laban bala temuai agi takut keluar ari menua diri empu.

“Taja pia, kitai ngarapka nengah insentif tauka bantu ari Perintah Besai sektor dagang temuai menua ulih idup ba skala domestik.

“Kelimpah ari nya, sektor bukai ti bekaul enggau dagang temuai baka industri pemakai enggau perengka pengangkut mega ulih dibantu mimit,” ku iya.

Karim bejaku munyi nya rambau bejadika Randau Begulai enggau Raban Nembiak beserimbai enggau Program Pejalai Nembiak Sarawak 2020 Dun Tupong di sebuah hotel ditu, kemari.

Ku iya, industri dagang temuai nyangka ulih ngerembai manah agi ba renggat kedua taun baru tu ila.

“Nya alai insentif sereta bantu ari Perintah Besai beguna endur ngetanka industri tu tetap teguh kelimpah insentif ari bajet negeri diri empu,” ku iya.

Sentang pengarap iya ngagai gerah Bajet 2021, Karim madahka iya ngembuan pengarap besai bajet ke sekali tu mungkur bantu ngelempungka tating pengidup rayat.

“Menua kitai ditinggang penusah ti balat iya nya penyakit Covid-19, aku ngarapka Perintah Besai deka mantu rayat ngelempungka tating pengidup sida.

“Nyangka ulih dikelaungka mimit pasal pekara perengkaguna, tang tating pengidup rayat patut ditambah enggau manah awakka rayat bulih pengelantang,” ku iya.

Suara Sarawak