Bayar lengkas elaun penerima PJM

SRI AMAN: Perintah Besai diansak lengkas agi meri bayar elaun ungkup penerima Pingat Jasa Malaysia (PJM) baka ke udah digerah ngagai Opis Pekara Veteran (JHEV) Raban Soldadu Malaysia (ATM).

Presiden Gerempung Veteran Soldadu Kor Renjer (PVTKR) Lt. Kol (B) Mohd Melintang Abdullah madah pekara tu patut dikemerat dikena ngintu pengelantang sereta ngenang jasa raban soldadu ke udah bebendar gawa nyaga pengelikun menua.

“Aku ngarika raban veteran minta pekara tu diaduka piak bekaul enggau naka pengelengkas ke pemaik raban penerima PJM,” ku iya madah ngagai Suara Sarawak, sehari tu.

Berebak enggau nya, Melintang madah kena 1 November tu tadi bala kaban PVTKR ari Sri Aman diuluka iya empu bisi datai nganjung pemeri RM2,500 ngagai anak niang Bujang Berani Datuk Sarjan Awang Raweng iya nya Tr Panggau Awang di Taman Padri, ditu.

Kenu iya, pemeri nya asil pupu bala kaban PVTKR ke seruran siruka pengelantang ruang bilik kaban gerempung tu.

“Meri terima kasih ngagai semua kaban PVTKR ke udah bela gerah jari besaup mantu sereta limpang datai ngabas sida Tr Panggau sebilik,” ku iya.

Bisi 15 iku kaban PVTKR datai ngabas sereta nyuaka bantu ngagai anak niang Bujang Berani menua.

Suara Sarawak