Intec bisi begunan baru di Kota Samarahan

KUCHING: Palan Injinir Entarabansa (Intec) ti diaduka Institusyen Injinir Malaysia (IEM) Pampang Sarawak deka ngembuan sebuah begunan baru di Kota Samarahan.

Sapit Kepala Menteri ti mega Menteri Infrastruktur enggau Pemansang Penyangkai Kapal Tan Sri Datuk Amar (Dr) James Jemut Masing madahka begunan nya deka digaga besai agi.

“Perintah Sarawak nyendiaka sebuah tanah ungkup begunan nya lalu ungkus ngaga begunan nya penyampau RM4 juta.

“Begunan tu ila deka dilangkar nyadi begunan gadung,” ku iya.

Masing bejaku munyi nya rambau ba aum pemberita rambau bejadika Opis Baru Institusyen Injinir Malaysia (IEM) Pampang Sarawak ditu, tadi.

Nangkan nya, iya madahka Perintah Sarawak udah nyapai sempekat enggau IEM Sarawak ungkup ‘one-to-one matching grant’.

Nyema IEM Sarawak ulih ngiga belanja RM1,000 perintah deka meri sida RM1,000 mega ungkup guna insfrastruktur.

“Nyema sida meri servis ti manah, perintah deka meri manah agi.

“Kitai deka nyendiaka insfrastruktur ungkup pansik sida laban pekara nya chukup beguna,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak