Kedup diatu chukup begunaka Temenggong enggau Pemancha

KUCHING: Pengawa nyiri ketuai komuniti enggau ketuai raban bansa (KMKK) di pelilih Kedup patut dikerumban, ku Adun Kedup Martin Ben.

Ku iya, KMKK nyadi orang ke pemadu beguna ba pengawa nyadi penyambung kaul entara komuniti enggau perintah.

“Nya alai, aku minta ngambika Perintah Sarawak ngerumban pengawa nyiri Temenggong enggau Pemanca komuniti Iban sereta temenggong ungkup komuniti Melayu.

“Penuduk nya apin diisi kenyau ari Serian diangkat nyadi siti begian ba nengeri tu dalam taun 2014. Nengah KMKK tu, nya mega ulih ngerumbanka agi pengawa mutarka penanggul ti ditapi komuniti ba pelilih tu,” ku iya.

Martin madah munyi nya lebuh bahas Rang Undang-Undang Perbekalan (2021), 2020 ba Aum Kedua renggat Kelima Dun Ke-18 ditu, kemari.

Ba lansa ke sama, iya mantaika peminta Gerempung Ketuai Komuniti Bidayuh ti minta ngambika Perintah Sarawak beratika baru elaun sida.

“Taja sida chukup beterima kasih ngagai bayar ke diberi nya, tang sida ngasaika bayar nya enda setimpal enggau tanggungpengawa enggau pemayuh kereja ti ditapi sida diatu, “ ku iya.

Suara Sarawak