Media enggau perintah mesti bebakih

KUCHING: Perintah Sarawak deka terus nyadi bakih media dalam bejalaika atur ubah pemansang menua, pupu bansa enggau juluk ke besai.

Kepala Menteri Datuk Patinggi Abang Johari Tun Openg madah, media enggau perintah patut begulai ngambika ulih meri pemaik ngagai Sarawak.

“Media ngempu tanggungpengawa beguna dalam mantu perintah madahka penerang ti amai ngagai mensia mayuh.

“Kita diatu mega napi pemar lebuh bebendar ngelaban sekeda berita bula ti ayan ba media rama dalam meti penerang ti betul ngagai rayat,” ku iya.

Abang Johari bejaku munyi nya ba Pengerami Makai Lemai Anugerah Pemberita Kenyalang (KJA) 2020 diatur ba sebuah hotel tebilang ditu, ensana.

Iya mega meri tanda basa ngagai media laban ti udah bebendar meri penyedar sentang pengerekai penyakit Covid-19 ti nyadi di menua tu.

“Terima kasih ngagai semua pemberita ti udah mantu meri penyedar pasal penyakit nya,” ku iya.

Tandu iya, Perintah Sarawak deka ngemanahka perengkaguna telekomunikasyen di Sarawak ngambika ulih meri pemaik ngagai bala media.

“Diatu Perintah Sarawak benung bekerejasama enggau Sacofa sereta Telekom ngambika ulih ngemanahka tikas sambung internet ngagai 5G.

“Enggau nya, kita ulih nganjung berita engkeman ba timpuh ti betul,” ku iya.

Sama bisi datai Menteri Kaunsil Kandang Menua enggau Pengawa Berumah Datuk Sri Prof Sim Kui Hian, Menteri Muda ba Opis Kepala Menteri (Pekara Korporat enggau Ukas) Abdullah Saidol enggau bala bukai.

Suara Sarawak