Pengawa meri surat pala tanah kelai perintah ngamatka semaya

SIBU: Bisi 24 iku peranak Tanjung Penasu ditu ke nerima surat pala tanah meri terima kasih ngagai perintah nengeri ke dipegai Gempung Parti Sarawak (GPS).

Senator Robert Lau Hui Yew madahka Perintah Sarawak seruran ngaku enggau ngetanka hak rayat pasal tanah Adat Bansa Asal (NCR) enti tanah nya amat hak sida nitihka atur undang-undang.

“Nadai sapa ulih mantah tanah NCR nya enti bisi dokumen enggau ngerintis tanah nya,” ku iya nerang, ditu ensanus.

Ku iya, pengawa nyuaka pala tanah nya nyata nunjukka Perintah GPS udah ngamatka semaya.

“Pengudah nyukat kelingi tanah enggau digazet nengah Seksyen 6 Kanun Tanah Negeri, Tanah NCR disukat chara lot kediri enggau diberi pala tanah nengah Seksyen 18 Kanun Tanah Negeri,” terang iya baru.

Sida ti nerima pala tanah nya disempulang Sekretari Politik Kepala Menteri Daniel Bujal.

Dulu ari nya, Sapit Kepala Menteri Datuk Amar Awang Tengah Ali Hasan udah bejadika Pengawa Nyuaka Gazet Rizab Komunal Bumiputera nengah Seksyen 6 KTN enggau Pala Tanah Seksyen 18 Kanun Tanah Negeri ungkup sitak Selangau Bagi Menua Sibu di Rumah Penghulu Surang Takin, Sungai Tajam Batang Oya, Selangau kena 26 Oktober tu tadi.

Ba pengawa nya, Awang Tengah udah nyuaka 229 pala tanah ngagai 229 iku penerima ari Sungai Tajam Batang Oya Selangau, Tanjung Penasu Batang Igan Sibu, Hulu Sungai Salim/Menyan enggau Pasai Siong.

Suara Sarawak