Rh Jemat kena penusah tanah tusur lemai kemari

SARATOK: “Asai deka labuh tukul atau ninga bala begau madahka bisi penusah tanah tusur nyadi ba tengah laman lemai kemari,” ku Edward Nuga Mari, 25 taun.

Iya madahka diri agi ba endur gawa di Pasar Saratok lebuh penusah nya nyadi ba rumah panjai sida di Nanga Malong ditu.

“Aku enda tepadahka kediri pulai ngagai tukey laban dibai kesal ati sereta berumban pulai udah nerima kanggau bala ari rumah.

“Nasip bendar nadai pekara ti enda manah nyadi ba penusah tu,” ku iya lebuh dirandau Suara Sarawak ditu, kemari.

Ketuai Balai Bomba enggau Penyah Penusah (Bomba) Saratok, PPgB Nazry Mohamat madah, sida nerima kanggau ari mensia mayuh urung pukul 02.17 lemai lalu berumban ngesah kia.

“Lebuh datai dia, kami meda tanah tusur kira-kira 10 meter penalam ba paking entukar bisi 30 meter ari ruai sida.

“Pun penusah dipelabaka bepun ari paip ai pechah dalam tanah enda jauh ari nya.

“Nadai penusah bebadi diripotka nyadi lalu Opis Bekal Ai Menua Pesisir (JBALB) bisi dikangau ngambi mutarka penanggul batang paip pechah nya.

“Penusah tu mega nadai ngeruga struktur rumah panjai sida,” ku iya madah nyemetak.

Ungkup penerang, Rumah Jemat Garak ba Nanga Malong, Awik pemanjai 33 pintu bilik ti diuan 228 iku peranak tu mega kala begau kena biau balai.

Ba penusah ke nyadi kena 22 Ogos nyin tadi, perabung rumah panjai sida tekebu ditabanka ribut.

EDWARD NUGA
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak