Servis Opis Perintah dikerembai ke Sri Aman, Serian tengan taun 2021

KUCHING: Palan Servis Sarawak deka dikerembai ngagai Bagi Menua Sri Aman enggau Serian ba tengan taun 2021, pia ku Kepala Menteri Datuk Patinggi Abang Johari Tun Openg.

Ku iya, nya entara inisiatif strategik dikena ngenegap servis perintah ngagai rayat ba Sarawak.

“Naka tu, kitai udah nyendiaka servis ngagai lebih ari 700,000 iku penguna ba Palan Servis Sarawak di UTC Kuching, Sibu enggau Miri,” ku iya.

Abang Johari mansutka jaku nya lebuh bejuraika Bajet Sarawak 2021 ba Aum Dun, ditu tadi.

Ku iya, RM7.1 juta diagih ungkup ngenegapka inisiatif nyendiaka servis pemadu manah nengah pengawa ngemanah sistem enggau digitalisasyen kelebih agi dalam projek digitalisasyen perintah.

“Nambahka nya, Perintah Sarawak deka ngagihka RM4.7 juta dikena ngemansangka pemanah servis perintah negeri enggau nampung inisiatif dalam Program Pemansang Ketuai.

“Program tu ulih nerenak ulah bekerejasama enggau nambahka penyulut orang gawa perintah sereta nambahka pengelandik sida ngambi nyulut agi lebuh gawa,” ku Abang Johari.

Suara Sarawak