STU ngarap bisi bantu khas ngagai nembiak sekula ba Bajet 2021

SIBU: Gerempung Pengajar Sarawak (STU) ngarapka bantu khas senentang pengawa ngajar ngena internet enggau online ungkupka perengkaguna nembiak sekula ba kandang mengeri enggau menua pesisir di Sarawak, bisi diperunding sereta dibantaika ba Bajet 2021 tu ila.

Dalam pekara tu, Presiden STU Macky Joseph andalka senentang bantu khas ba internet ungkup raban nembiak sekula enggau pengajar deka mantu ngenegapka agi pengawa belajar enggau ngajar nengah chara online.

“STU ngarapka Bajet 2021 bisi nyengkaum sereta berundingka perengkaguna ungkup pengawa ngajar enggau belajar ngena chara online enggau internet, tu ungkupka pelajar ba serata nengeri kelebih agi sekula ba kandang menua pesisir enggau ulu entigis.

“Bisi jantil (Internet) enggau data ti ngembuan tikas pengelaju tinggi. Pelajar ungkupka semua.

“Nya alai, elawin khas baka data internet kena raban nembiak sekula enggau pengajar patut bisi ungkup, ngambika pengawa nya ulih dipejalaika enggau lanchar,” ku iya.

Macky madah munyi nya lebuh ditanya pengarang berita kemari bekaul enggau pengarap STU ba Bajet 2021 ti deka dibantaika kena 6 November tu ila.

Nangkanka nya ku iya, bajet tu ila mega patut berundingka senentang pengelikun raban pengajar lebuh bejalaika pengawa ba sekula.

“Sekeda ari bantu ke bukai ti patut bisi iya nya baka skim insurans pengelikun ari subsidi perintah ungkup raban pengajar lebuh napi timpuh ti mar baka kemaya hari tu.

“Kebuah pia, bala pengajar bejalaika dua bengkah tanggungpengawa raban ba baris luan, iya nya nyadi raban ba baris luan kena nentuka pelajar ulih dipejalaika nengah bemacham bengkah platform enggau nyaga pengelikun nitihka SOP (Atur Pengawa Standard) lebuh bejalaika pengawa tauka meresa tikas pengangat tubuh nembiak sekula sebedau tama ngagai sesebuah sekula nya,” ku iya nambah.

Berebak enggau tu ku Jacky, STU ngarapka bantu perengka guna kena nyaga pengelikun enggau pengerai diri ungkup sekula ulih diteruska.

Apin lama ke udah, Menteri Besai Tan Sri Muhyiddin Yassin ba siti penerang empai lama madahka Bajet 2021 tu ila deka nyendiaka agih belanja ti engkeman kena napi sereta ngemunaska pandemik Covid-19 tu.

Ku iya, perintah deka mantaika mayuh langgur ke bukai dalam Bajet 2021 ti deka dibantaika kena 6 November tu ila, ke mega sekeda ari pengawa perintah kena mulaika pengidup rayat baka selama.

Suara Sarawak