Timpuh Sukma ti agi lama peluang negapka pengering atlit

KUCHING: Semua atlit lama Para Nyemerai Sukma Sarawak dikearapka ulih ngetanka pemanah rikod ke dipegai diri empu ba Lumpa Para Sukma deka datai.

Pematih Para Nyemerai Sarawak, Julius Jaranding madah ungkup lumba para sukma deka datai ulih ngetanka pemanah rikod enggau ungkup atlit baru arapka sida bebendar agi belatih bepun ari diatu.

“Aku ngarapka bala atlit nemu nguna timpuh peluang ti panjai sekumbang Atur Tagang Pemindah (PKP) baka ke diatu, nguna nya dikena nambahka pengering enggau pengulih diri.

“Sida diatu diberi pilih sekalika nya belatih ba rumah diri tauka nurun ngagai pegung nyemerai baka di Kompleks Belia dan Sukan ba Jalai Tun Datuk Patinggi Hj Ahmad Zaidi Adruce.

“Semua bela udah nemu Lumba Para Sukma dilanjar ngagai taun 2022,” ku iya.

Julius Jarandang

Julius madah munyi nya lebuh dirandau Suara Sarawak bekaul enggau penyikap raban atlit Para Nyemerai Sarawak ungkup Sukma (Lumba Malaysia) ti deka diatur ba Johor taun baru tang dilanjar ngagai 2022.

Ungkup rikod, Sarawak ngembuan rikod ke chukup nyulut ba lumba Para Sukma iya nya mujur nyadi champion 13 kali bejurut kenyau lumba tu diatur ari taun 1994 nyentuk 2018.

Nya alai, ungkup Para Sukma deka datai Sarawak sekalika ngembuan juluk ke besai deka ngetanka gelar champion penuh.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak