Tinggal 587 buah sekula repuk di Sarawak bedau diseleti

KUCHING: Naka tu, bisi 433 ari 1,020 buah sekula repuk ba Sarawak udah diseleti, ku Dr Annuar Rapaee.
Menteri Muda Pekara Pelajar, Sains enggau Pansik Teknologi nya madah laluh 587 buah sekula benung diseleti ba timpuh dua ngagai tiga taun tu.

Pia mega, Dr Annuar andalka kaul manah entara Perintah Sarawak enggau Perintah Besai ulih mutarka penanggul tu enggau lengkas.

“Belanja dikena nyeleti semua sekula repuk ba menua tu nengah agih belanja kededua perintah ke alai RM1.855 bilion udah disedia naka tu.

“Ari penyampau nya, RM517 juta disedia Perintah Besai enggau RM338 juta ari Perintah Sarawak seraya RM1 bilion nya panjar ari Perintah Sarawak,” ku iya.

Dr Annuar mansutka jaku nya lebuh nyaut tanya Adun Daro Safiee Ahmad pasal status pemadu baru pengawa nyeleti sekula repuk ba Sarawak ba aum Dun, ditu kemari.

“Ba taun 2017, Perintah Besai udah setuju mantu nyeleti sekula repuk lebuh ngemendar agih belanja RM1 bilion iya nya RM500 juta ungkup taun 2018 enggau RM500 ungkup taun 2019.

“Agih belanja RM417 juta agih belanja ungkup taun 2018 udah dikena seraya semina RM100 juta aja agih belanja diberi ungkup taun 2019 taja Perintah Besai ke dulu udah ngemendarka agih belanja RM500 juta,” ku silik agi.

Nambahka nya ku iya, inisiatif Perintah Sarawak mayar panjar nyeleti sekula repuk ti ngasuh pengawa nyeleti sekula ba Sarawak ulih dipejalai.

“Kitai engka nadai nerima agih belanja ungkup nyeleti sekula tu enti sema nadai mayar panjar RM1 bilion tu,” ku iya.

Kelimpah ari nya, iya mujur Bajet 2021 ti ngagihka belanja RM725 juta dikena nyeleti sekula repuk ba Sabah enggau Sarawak laban penyampau nya tinggi agi ari agih belanja sebedau tu.

“Nya alai, aku ngarapka penanggul tu ulih diputar enggau manah ba selampur menua,” ku Dr Annuar nyemetak.

Suara Sarawak