Upah enda ngasika atur, siku nembiak dikompaun

BINTANGOR: Siku nembiak kolej dikompaun laban ngelanggar atur kuarantin di rumah ba Atur Mindah Betagang Penyuman (PKPP).

Ketuai Polis Pelilih Meradong, Deputi Superitendan Polis (DSP) Sekam Anoi madahka ukum nya dipejalai udah sida meresa enggau matau nembiak nya ba sebuah genturung pendiau ditu.

Lebuh diperesa urung pukul 9.30 pagi, 8 November nyin tadi, nembiak nya nadai di rumah.

“Iya ditemu ngelanggar atur matau di rumah ba Seksyen 22(b) Akta Pencegahan enggau Pengawalan Penyakit Berjangkit 1988 ( Akta 342 ) , mindah ari rumah dalam timpuh kuarantin.

“Nya alai nembiak tu dikompaun lalu dibai ngagai Opis Pengerai Pelilih Meradong ungkup atur bukai,” ku iya lebuh dirandau.

Sekam madahka polis meri perati serius ngagai ulah baka tu lalu deka bejalaika atur terit ngagai sida ti ngereja penyalah nya.

Suara Sarawak